Finamira: Cumprar la casa dil club

(anr/abc) La radunonza generala dil Club da golf Buna Vista Sagogn ei mintgamai cumbinada culla generala dalla societad Golf Sagogn Schluein SA. El center ein las elecziuns stadas. Leo Cathomas ha surdau il presidi a Christian Capaul. Treis puncts ein stai el center dalla radunonza annuala dils acziunaris e commembers. Inagada ei quei il bien quen da gestiun 2018. Ei seigi stau il meglier dapi che la societad exista, ha Leo Cathomas menziunau en siu rapport annual. Las mesiras instradadas avon quater onns muossien effect ed influenzeschien positivamein la gestiun. Igl onn vargau ha la Golf Sagogn Schluein recaltgau in cash flow da 425 047 francs. A quei resultat hagi oravontut la sviulta augmentada dils commembradis novs contribuiu. Lu hagien ins era saviu tener a mistregn ils cuosts cun in’administraziun premurada. Grazia a quei resultat ha la societad saviu reducir ses deivets per 220 000 francs.

Quater candidats per treis posts

Sco secund punct dalla 13avla radunonza generala dalla Golf Sagogn Schluein SA ein las elecziuns stadas el center. Suenter esser staus tschun onns al tgamun dalla societad ha Cathomas surdau il presidi. Il zercladur 2014 eis el vegnius eligius ed ha giu da surprender la funcziun da reorganisatur d’ina societad che fuva vidlunder da far naufragi. Ensemen cul captain Sep Caduff, morts il november 2017 suenter cuorta e greva malsogna, ha el menau quella silla via al success. Sco siu successur ha la radunonza generala eligiu il vicepresident Christian Capaul, Laax. Dapi ils 16 da matg 2015 representa el la vischnaunca da Laax el cussegl d’administraziun.

Cun maun pli ha la radunonza generala reeligiu ils treis ulteriurs commembers dil gremi directiv, Hans Peter Casutt (president communal Sagogn), Bruno Wellinger (president communal Schluein) ed Erwin Senn (captain) per ina proxima perioda da quater onns. Sper il president Leo Cathomas havevan dus ulteriurs commembers dil cussegl administrativ demissiunau. Quater persunas han candidau per treis posts. Pils abdiconts Anne Bindschädler, Reto Gurtner sco era pil vicepresident d’entochen ussa e president niev Christian Capaul havevan las partiziuns dallas ladies proponiu Sandra Chistell Omlin, quella dils umens Wolfgang Gruber e quella dils seniors Jürg Spitz e Martin Vonmoos. Ella votaziun a scret ha la radunonza eligiu Spitz, Gruber e Chistell Omlin.

Suenter las elecziuns han il president partent Leo Cathomas ed il captain dils umens, Roland Anderegg, informau dil stan dallas contractivas pertuccont la cumpra dalla casa dil club. Immediatamein suenter la radunonza generala ha ina cumissiun surpriu quell’incumbensa. Finamira eis ei da fusiunar las duas societads Golf Sagogn-Schluein SA e la Buna Vista Clubhaus SA. Posseder la casa dil club enstagl dad affittar ella seigi a liunga vesta pli persistent e fetschi senn. Era duei el futur la carga dalla facultad immobiliara vegnir purtada pli ulivamein. Actualmein ein 17 investurs acziunaris dalla societad purtadra dalla casa dil club, il principal ei Peter Sauber. El futur duei negin investur s’engaschar cun dapli che 250 000 francs. La situaziun finanziala ch’ei semigliurada considerablamein possibilitescha alla Golf Sagogn-Schluein SA da finanziar la cumpra dalla casa dil club sur ina banca. Sco quei che Cathomas ha declarau vegn la societad a stuer impunder ina summa da 5,35 milliuns francs per l’immobilia ch’ei d’impurtonza existenziala pil club da golf Buna Vista.