Pacs pastgeders ed anc pi pacs peschs

DA GION NUTEGN STGIER / ANR

Siva digl 1980 dattigl la concurrenza da pestga digl lai da Marmorera. Schi pacs peschs scu sonda passada èn anc mai nias tgappos tar chella concurrenza. Angal quatter peschs èn nias piglias or digl lai digls 14 pastgeders. Schi maira è la pestga anc mai stada siva tgi dat la concurrenza da pestga digl lai da Marmorera. Introduia chella veva avant 39 onns Köbi Janutin, barmeir, da lez taimp ustier e possessour digl restorant Lai da Marmorera. Proprietari da chel travagl è oz Marcello Virgolin, e cun ferm sustign da Jürg Giovanoli ò el organiso, scu gio avant en onn, la concurrenza da pestga 2019.

Angal ple 14 participants

Igl onn passo vevan anc 25 pastgeders piglia part alla concurrenza da pestga digl lai da Marmorera, tuttegna en bel domber. Tgappo vevan chels alloura gist angal set peschs. Ossa sonda passada on schizont angal 14 pastgeders tschartgea lour furtegna alla riva digl lai artifizial. La raschung principala tgi igl interess è sto schi pitschen è bagn l’ora, ella tgi è sa mussada tot otra tgi ampernevla sonda dumang bagn marvegl. L’ava era er pitost mengia freida per ena buna pestga, igls peschs inactivs cun esser agl fons digl lai e la plievgia on er contribuia igl sies tgi è betg sto schi ideal per pastger. Vetiers vign tgi igls pastgeders pi segls onns sa participeschan betg alla concurrenza u von schizont betg ple a pastger. L’atmosfera tranter igls participants, chella era tuttegna fitg buna sonda vers mezde cura tgi la concurrenza da pestga è eida a fegn. Chegl tiers tgi digls 14 pastgeders on diesch gia da turnar agl restorant cun la trentga veida. Lò ò Giovanoli ansomma betg gia strantg cun misirar la lunghezza digls peschs, eran chegl angal quatter tocs.

Gio igl 1997 gudagnea 
la concurrenza

Scu gio menziuno on igls 14 participants angal tgappo quatter peschs. Egn da chels pastgeders è Andrea Huder, uriund da Seglias, cun dimora a Wollerau. Prest 30 onns è la pestga dasper la tgatscha la sia gronda passiun. Las relaziuns da pastger agl lai da Marmorera canoscha el fitg bagn cun ple u manc angal pastger alla riva da chel lai. Graztga agl sies bel pesch, cun ena lunghezza da 37,3 cm ed en peis da 490 grams, ò Huder gudagnea la concurrenza da pestga da sonda passada a Marmorera. Tschif chella bela litgiva ò el la dumang allas 06.00 e chegl lò noua tgi igl ragn da Flex sbucca aint igl lai da Marmorera. Siva d’aveir gia chel cletg vegia el betg gia ple angal ena morsa, manegia Huder. Tar la concurrenza da pestga digl lai da Marmoera è el betg sto per l’amprema geda sensom igl podest cun gio aveir gudagnea igl 1997 la madema concurrenza.

Dus pastgeders rutinos

Cun Andrea Huder segl podest è anc sto Urs Huder, sies frar, el tgi stat a Domat. El ò tgappo ena litgiva cun ena lunghezza da 32,5 cm e nia vicerètg-pastgeder digl lai da Marmorera. Igl terz post ò obtignia Jürg Giovanoli da Beiva cun pastger ena litgiva da 25,2 cm. Tar egn digls quatter furtinos ò er anc tutgia Bortol Jacomella da Beiva, el tgi stat a Turitg ed è savens an sies li nateiv per eir a pastger. La sia litgiva veva ena lunghezza da 25 cm. Dalla rangaziun ò igl ustier Marcello Virgolin angraztgea agls sponsours, agl Wasescha Sport, Savognin, 
ed agl affar da pictour Cadotsch da Savognin.