D’ün arrandschamaint regiunal ad ün internaziunal

DAD ANNATINA FILLI / ANR

Al 25avel Simposi internaziunal da sculpturas a Sur En as partecipeschan la mità da gün 18 artistas ed artists da tuot il muond. Wolfgang Bosshardt s’algorda dals prüms simposis e co cha quels s’han sviluppats. Per la 25avla vouta resunan in gün ils tuns da las resgias a motor, dals martels, s-chalpens e sgürs sül camping da Sur En. 78 artistas ed artists da tuot il muond vaivan s’annunzchats pel simposi da giubileum. La giuria ha per finir decis per ses artistas e 12 artists. Dürant ün’eivna lavuran els lung l’En vi da lur progets artistics in lain, metal, crap o cumbinaziuns dals differents materials. Ün dals iniziants dal Simposi internaziunal da sculpturas es Wolfgang Bosshardt da Sur En.

La mancanza d’ün simposi d’art

Da l’on 1994 d’eira gnü organisà il prüm Simposi internaziunal da sculpturas e quai cun la partecipaziun da ses artistas ed artists. «L’idea per quist simposi ha gnü Jean Badel», s’algorda Bosshardt, il mainagestiun da la Società Art Engiadina. L’artist da Guarda d’eira da l’avis cha in Engiadina mancaiva da quel temp ün simposi d’art. «Be il lö nu vaiva’l e quel til n’haja pudü spordscher cun meis campadi a Sur En», manzuna’l. Ils prüms simposis gnivan finanziats cun las contribuziuns dal chantun Grischun, cun las donaziuns dals sponsurs ed il vanz gniva surtut da Bosshardt. Pacs ons davo il prüm simposi s’haja miss ad ir la Senda da sculpturas intuorn Sur En. «Il prüm expuonaivan nus las sculpturas chi nu gnivan vendüdas sül campadi. Cun l’ir dals ons ans mancaiva il lö e perquai vaina pensà da realisar la Senda da sculpturas.» Lung quista senda rivan quellas ouvras chi nu vegnan vendüdas dürant il simposi. Talas restan per duos ons in proprietà da l’artist. «Sch’el nu riva da vender in quel temp sia sculptura ha’l lura amo trais ons temp da gnir per ella», declera il mainagestiun, e: «Davo tocc’la lura a la Società Art Engiadina.» Lung quista senda s’han ramassadas dürant ils ultims ons var 130 ouvras da lain, marmel, fier o eir cumbinaziuns da tuots quists materials.

Üna giuria fa la selecziun

Daspö 25 ons vain minch’on scrit oura da nouv il Simposi internaziunal da sculpturas chi vain daspö l’on 2010 organisà da la Società Art Engiadina. «Da tuot las annunzchas chi aintran selecziunescha üna giuria las partecipantas e’ls partecipants», declera WBosshardt. Ingon ha’l insembel cun Daniel Cotti, Peter Horber e Robert Schreyer tschernü ils 18 partecipants. «Al comitè d’organisaziun fan part adüna eir artists, els san da güdichar scha’ls progets inoltrats pon gnir realisats infra ün’eivna», disch el. Dürant ils ultims ons s’ha sviluppà il Simposi internaziunal da sculpturas ad ün evenimaint important per la scena d’art in Engiadina Bassa ed es dvantà cuntschaint eir sül palc internaziunal. «Eir ingon vaina l’ün o l’oter artist chi ha fingià üna vouta as partecipà a nos simposi», uschè Bosshardt. Tanter dad els es eir l’inziant dal simposi, Jean Badel. Bosshardt s’algorda dals prüms simposis cur cha tuot d’eira amo ün pa plü simpel e plü spontan. «Hoz faja dabsögn da blera lavur administrativa cun scriver oura il simposi, scriver confermas, aderir als giavüschs dals partecipants e procurar pels visums e’ls permiss bsögnaivels», manzuna’l. Per accumplir tuot quistas incumbenzas survain il mainagestiun agüd da la suprastanza da la Società Art Engiadina.

Lavurar cun differents materials

Ils respunsabels dal Simposi internaziunal da sculpturas mettan a disposiziun a las artistas e’ls artists tuot tenor giavüsch ün trunc da larsch d’üna lunghezza da var quatter meters e cun ün diameter da 50 centimeters. O lura daja quels chi creeschan our d’ün bloc da marmel da Laas i’l Tirol dal süd lur ouvra o chi lavuran culla cumbinaziun da quists duos materials. Pel simposi d’ingon nu s’haja tschernü ingün motto. «Quai vaina adüna darcheu fat e sperain da pudair dar cun quai avuonda libertà als artists per lur sculpturas», disch Bosshardt. Dürant ün’eivna han tuot ils interessents, giasts dal camping e glieud chi fa üna spassegiada lung l’En la pussibiltà d’observar dals 15 fin als 22 da gün co cha las ouvras naschan. In sonda, ils 22 da gün a partir da las 15.00 ha lö la vernissascha. Il public es invidà d’inoltrar lur propostas pel premi dal public. Las ouvras preschantadas sun vnalas.

Ulteriuras infuormaziuns e la glista da las artistas e’ls artist d’ingon as chatta sülla pagina d’internet www.art-engiadina.com