Ligia Grischa a Ziraun, Glion e Berna

(anr/abc) Quei chor s’auda tier la veta culturala dalla Surselva. Igl onn 1852, cu la Ligia Grischa ha entschiet a cantar, ha Gion Martin Darms tschentau il fundament per in’ambassadura dalla cultura romontscha. Quei chor concertescha proximamein. Il concert 2019 ei titulaus «Dalla Russia a Maton – ed anavos». Ils 70 cantadurs cun lur dirigent Christoph Cajöri ein sepreparai ils davos meins per ina scuntrada denter las duas culturas. Canzuns da Peter Tschaikowsky (1840–1893), Dmitri S. Bortniansky (1751–1825) e Pawel G. Tschesnokov (1877–1944) s’uneschan cun talas da Tumasch Dolf (1889–1963) e Benedetg Dolf (1918–1985).

Dus Rs

Igl ei ina pintga selecziun da tocs che s’accordan zaco in cun l’auter. Zaco ein Russ e Romontschs parentai, ellas emoziuns ed ella musica. Il fundatur dil chor viril Ligia Grischa, Gion Martin Darms, vegness a confirmar quei. El havess la dètga luschezia ch’il chor sepresenta sonda proxima a Ziraun egl intschess dalla Renania. Pil dirigent Christoph Cajöri eis ei stau in giavisch explicit da concertar ella baselgia da s. Martin. Quei liug sacral ei renomaus pervia da siu plantschiu gotic cullas scenas biblicas. Cu ils 70 umens vegnan ad intonar l’emprema canzun «Gospodi pomiluj» da Tschaikowsky vegn l’atmosfera ad esser unica. Igl auditori astga selegrar sin in concert plein sentiment. Arranschaments, ovras originalas e melodias popularas d’omisdus R, ils Russ ed ils Romontschs sebrattan. Denteren suna la harpista Johanna Baer e cumpletescha il bi program. Baer viva a Turitg, ell’ei solista diplomada silla harpa. Baer ha sunau cun divers orchesters svizzers (Orchestre de la Suisse Romande, Luzerner Sinfonieorchester, Opera Turitg, Musikkollegium Winterthur, Sinfonieorchester Sogn Gagl, Kammerorchester Basilea eap.), dapi igl onn 2001 eis ella commembra digl Orchester sinfonic Bienna Solothurn. El concert cul chor Ligia Grischa vegn ella a sunar intermezzis cun ovras da Stan Golestan, Marcel Tournier, Reinhold M. Glière e Michail Iwanowitsch Glinka. Quell’ovra ha Glinka fatg igl onn 1828. Ils tuns dalla harpa ed ils tuns loms dil chor viril s’audan tier omisduas culturas, la russa e la romontscha. Ch’il concert dalla sonda sera ei ella baselgia da Ziraun ha in connex direct cun bab e fegl Dolf. Ella Val Schons ei in comite vidlunder da transformar la casa nativa da Tumasch Dolf en in albiert che survescha als chors. La «Tgea da tgant» regorda el futur aunc pli ferm als cumponists da numerusas canzuns popularas romontschas.

La Ligia Grischa vegn naturalmein ad interpretar zacontas dallas pli enconuschentas. Aschia «Mo aunc in pign mument». Il text dalla canzun ei da Steffan Gabriel (1570–1638), il predicant da Glion fuva fugius entuorn il 1620 cun sia famiglia ella Val Schons. Quella canzun populara ed in’autra ch’il chor conta, «Egl jester», lai sentir empau la sentimentalitad ch’unescha la Russia e la Romontschia. Las oraziuns ord la liturgia russ-ortodoxa vegn il chor ad intonar la sonda a Ziraun e la dumengia ella baselgia claustrala dalla soras dominicanas da Glion. Cajöri ha arranschau diversas melodias dils renomai cumponists russ.

La dumengia, ils 26 da matg 2019 ha il chor Ligia Grischa la honur da concertar el Münster a Berna cul chor mischedau Pro Arte. Omisdus chors diregia Cajöri. Ei po esser in deletg da tedlar il cant russ e romontsch ella baselgia gotica culs aults arviuls.

Il concert annual dalla Ligia Grischa ei sonda, ils 18-5-2019 allas 20.15 ella baselgia da s. Martin a Ziraun. Per quei concert ei l’entrada libra, ei dat ina collecta en favur dalla Tgea da tgànt a Maton. La dumengia, ils 19-5-2019 ei il concert a Glion ella claustra, e quei allas 14.15. Il tierz concert ei dumengia, ils 26-5 allas 17.00, el Münster a Berna.

Prevendita mira www.proartechor.ch