«Optimar vinavant la chatscha»

Da Hans Huonder / anr

Il resultat da la votaziun davart la chatscha speziala è pli satigl che spetgà. Las numerusas vuschs a favur da l’iniziativa pretendan dal chantun da reponderar co optimar ses sistem da chatscha da tschiervs. Tgi che ha ughegià ina prognosa per la votaziun davart l’iniziativa cunter la chatscha speziala ha gughegià da sa mover sin glatsch ualti satigl. Il resultat mussa quai. 45,77 pertschient da las votantas e dals votants han sustegnì l’iniziativa, 54,23 pertschient han refusà ella. 50 pertschient da tuttas votantas e votants èn sa rendids a l’urna. Cusseglier guvernativ Mario Cavigelli, chau dal departament da bajegiar, traffic e forestalesser, è fitg cuntent cun il resultat: «La chatscha cun dus stgalims è acceptada. Malgrà quai ha i num optimar vinavant la chatscha da tschiervs.» Per il coniniziant Renatus Casutt èsi cler: «Quest grond dumber da geas a favur da l’iniziativa pretenda dal chantun ina correctura tar la chatscha da tschiervs.» Da quest maini è er Robert Brunold, president da l’Uniun chantunala dals chatschaders grischuns: «Nus avain ditg cleramain gia avant la votaziun ch’i dovria ina correctura en quest senn ch’i saja pussaivel en l’avegnir da sajettar dapli tschiervs durant il settember.» I saja uss chaussa da la cumissiun da chatscha chantunala da discutar soluziuns per il futur e surtut er da procurar che la populaziun da tschiervs na creschia betg vinavant.

commentari e Pagina 2