Tgamona Jenatsch: 
Da nov tranter las top diesch

(gns/anr) Gist quatter tgamonas grischunas figureschan tranter las diesch cun las pi bleras pernottaziuns an Svizra. Dus da chellas sa chattan an nossa regiun. Chegl èn la tgamona Kesch e la tgamona Jenatsch. Da curt ò igl Club Alpin Svizzer (CAS) publitgia quantas pernottaziuns tgi las 153 tgamonas on fatg igl 2018. Igl domber total schea tar 343 000 pernottaziuns, chegl tg’èn 13% daple tgi anc igl onn precedent. Gist en plus da 30% tar las pernottaziuns on gia las tgamonas tgi sa cattan ainten igls cantuns Son Giagl e Glaruna, suandadas da chellas digl cantun Berna cun en augmaint da 21% e dallas tgamonas digl cantun Uri cun en augmaint da 17%. Las 28 tgamonas tgi vagn an noss cantun on fatg igl 2018 en total da 75 054 pernottaziuns, chegl tg’è en plus da 16%. Igl anviern 2018 on 15 510 alpinists durmia ainten egna dallas tgamonas grischunas e la stad digl davos onn èn chegl stos 59 544 dels.

En plus da 39% 
per la Kesch…

Scu gio siva da ples onns las pi bleras pernottaziuns on eneda daple er fatg igl 2018 aint igl Grischun las dus tgamonas Terri e Maighels tgi sa cattan an Surselva. La Terri ò gia en plus da pernottaziuns da 26% e la Maighels en plus da 6%. Gist 39% daples pernottaziuns ò fatg gl’onn passo la tgamona Kesch (2625 m sur mar) tgi sa catta sur Barvogn. Gio varsa- quants onns vign ella manada da Reto ed Ursina Barblan, igl pêr tgi varda bagn digls alpinists e giasts. Angal las dus tgamonas Lischana (Nagiadegna Bassa) cun en plus da 57% e la Ramoz (Arosa) cun en plus da 45% on gia an cumparaziun en pi grond augmaint tar las pernottaziuns tgi la Kesch igl 2018.

… ed en plus da 24% per la Jenatsch

Luvro bagn igl 2018 ò er la tgamona Jenatsch tgi sa catta agl pe digl Piz Calderas, dantant sen territori engiadines. Vurdo naziunal è ella per l’amprema geda tranter las top diesch dallas tgamonas, chegl tgi pertotga las pernottaziuns. Pernotto on gl’onn passo 5244 alpinists ainten la tgamona Jenatsch. An cumparaziun cugl 2017 è chegl en augmaint da pernottaziuns da 24%. Remarcabel è tgi chella tgamona ò igl anviern 2018 fatg cun en total da 2334 pernottaziuns angal 576 pernottaziuns pi pac tgi la stad 2018. Digl 2012 anfignen avant curt on Fridolin Vögeli e Claudia Drilling mano la tgamona cun bler plascheir, ella tg’è cun 2652 m sur mar la pi ota situada tgamona digl Grischun. Da nov a parteir digl zarcladour èn Jill Lucas e Daniel Sidler hospitants dalla tgamona Jenatsch. En plus da 29% tar las pernottaziuns (total 918 pernottaziuns) ò er gia gl’onn passo la tgamona Ela tgi sa catta tranter Surses e la Val Alvra.

Las top diesch dalla Svizra

Tgamona cantun pernottaziuns

Britannia VS 7565

Lämmeren BE 7138

Konkordia BE 6688

Blüemlisalp BE 6547

Tracuit VS 6535

Terri GR 6038

Kesch GR 6021

Dix VS 5934

Maighels GR 5902

Jenatsch GR 5244

Las top diesch digl Grischun

Tgamona regiun pernottaziuns

Terri Surselva 6038

Kesch Tavo 6021

Maighels Surselva 5902

Jenatsch Nagiadegna 5244

Carschina Coira 5073

Tuoi Nagiadegna Bassa 3676

Tschierva Bernina 3639

Sao Seao Bernina 3629

Silvretta Purtenza 3387

Albigna Bergiaglia 3187