Uestgiu da Cuera

Sut il datum dils 20 da matg 2019 ha papa Francestg acceptau la demissiun da msgr. Vitus Huonder sco uestg da Cuera. La successiun surpren ad interim – sin incarica da papa Francestg – msgr. Peter Bürcher, uestg emeritau da Reykjavik. Uestg Vitus Huonder pren cumiau en ina brev, datada dils 20 da matg 2019, dils spirituals, diacons, collaboraturas e collaboraturs en survetsch dalla baselgia e dils fideivels dalla diocesa.

Igl uffeci episcopal egl uestgiu da Cuera surpren ussa uestg Peter Bürcher. El vegn beneventaus d’uestg Vitus Huonder che giavischa ad el la benedicziun da Diu per siu niev pensum.

Uestg Vitus Huonder vegn a prender – sco gia enconuschent – dimora ella Casa dils spirituals egl Institut Sancta Maria a Wangs (SG). Quella s’auda alla fraternitad dils spirituals da sogn papa Pius X. Secund il giavisch dil papa vegn el a sestentar leu per l’unitad dalla baselgia tras accumpignar e gidar dad integrar.

Per igl administratur apostolic digl uestgiu da Cuera, igl uestg emeritau e pensiunau Peter Bürcher, che ha 73 onns, eisi stau ina surpresa totala ch’il papa ha nominau el sco administratur apostolic per igl uestgiu da Cuera, schegie ch’el hagi giu resalvas e fatg patratgs visavi la missiun d’in administratur apostolic pigl uestgiu da Cuera.

Il papa ha denton vuliu confidar quei pensum ad in uestg mo per in 
pèr meins sco quei ch’el hagi detg a msgr. Peter Bürcher tier ina audienza privata.

Giuseppe Gracia e secretariat episcopal Cuera