Plattafuorma digitala

Da Sandro Buchli

Oscar Eckhardt e Vincenzo Todisco han presentau gliendisdis sera ella Biblioteca cantunala a Cuera lur project d’ina plattafuorma digitala che s’occupa culs lungatgs dil Grischun. Il project vegn sustenius digl Institut per la perscrutaziun da cultura grischuna e dalla Scol’aulta pedagogica. Lur intent eis ei da metter a disposiziun ella reit informaziuns retschercadas davart la situaziun linguistica. E quella ei ordvart cumplexa el Grischun. Sper il lungatg tudestg cun 74% plidadras e plidaders ein rodund 15% da lieunga romontscha e bien 13% italofons. Plurilinguitad ei pia omnipresenta el Grischun. Era ord perspectiva globala semuossa in maletg cumparegliabel: Il mitos ch’ils biars affons seigien monolings vegn renviaus dils referents: «La gronda part dalla carstgaunadad ei numnadamein plurilingua, cunzun en tiaras sco ell’India ni ell’Africa. Dus tiarzs dils affons creschan si cun dus ni plirs lungatgs.»

Artechels romontschs

Entochen oz ein rodund 10 artechels vegni publicai che dueien svegliar interess, furnir informaziuns per la discussiun e forsa schizun provocar ina ni l’autra reacziun. Ina cuorta resumaziun all’entschatta digl artechel possibilitescha ina lectura efficienta. La maioritad dils artechels sefatschenta directamein culla situaziun dil romontsch. Aschia scriva per exempel Barbla Etter davart il tema brisant dallas fusiuns da vischnauncas e las consequenzas pil romontsch. La contribuziun da Clau Solèr illuminescha effects positivs e negativs dil manteniment dil lungatg. Flavia Hobi perencunter sefatschenta cun identitads da lungatg tier persunas d’instrucziun. La plattafuorma secapescha sco «work in progress». Ils iniziants speran ch’ei suondi aunc vitier in ni l’auter artechel.