Seivs per ples scopos

DA GION NUTEGN STGIER / ANR

La firma «Zaunteam» è ena fatschenta internaziunala cun 100 filialas. Dus da chellas sa cattan aint igl Grischun ed egna da chellas è staziunada a Beiva. Manada vign ella da Hugo Giovanoli. Sonda passada ò mintgign pudia piglier invista quant gronda tgi la purscheida da seivs è tar chel travagl.

La firma «Zaunteam» dattigl gio siva digl 1989 e fundada è chella neida da Walter Hübscher. Avant 30 onns è el sto an Australia e per en taimp luvro tar en pour tgi veva er ena fatschenta per montar seivs. Hübscher è sto incanto da chella lavour e cun turnar an Svizra sa decidia da fundar ena fatschenta per la montascha da seivs. Bagnspert ò el gia blers clients, cunzont pours ed impressaris. Oz ò la firma «Zaunteam» 600 ampluias, 30 filialas an Svizra, 60 fatschentas an Germania e 10 travagls an Austria.

Pigl Grischun central 
e la Nagiadegna

Cun Hugo Giovanoli, igl pour e proprietari d’en affar da transports, ò la firma «Zaunteam» catto en partenari tgi ò musso grond interess per ena collaboraziun. Cugl menaschi betg aveir ena filiala tetgala aint igl Grischun central ed an Nagiadegna è la direcziun digl «Zaunteam» stada cuntainta tgi Giovanoli ò surpiglia la represchentanza da chella interpresa internaziunala an chellas dus regiuns. Dasper la filiala a Beiva dattigl er anc egna a Tumegn e l’otra a Bogn Ragaz. La sedia principala dalla firma «Zaunteam» sa catta a Frauenfeld.

Ena gronda collecziun

Cun Giovanoli lavouran anc treis persungas per la filiala digl «Zaunteam» a Beiva. Scu cunsiglieder e planisader pigls clients è Thomas Zimmermann tgi stat a Vicosoprano responsabel. Per la montascha dallas seivs segna alloura pitost igl patrung sez cugls oters dus collaboratours. La collecziun dallas seivs è fitg gronda e vasta. Hübscher dei tgi cun aveir ena seiv en coz da veta da passa 25 onns dovrigl material da buna qualitad. La qualitad seia alloura er la marca dalla firma «Zaunteam», chegl tgi igl clients cuntaints conferman adegna puspe. Las seivs tgi Giovanoli fò venal èn da lenn, fier, aluminium, met, glas e matergia sintetica. I dat er seivs an furma da giatters e pussebel è er da lascher far ena seiv cun crap, sumigliainta ad en meir (Flechtfix).

Igl sortimiant vign agiunto permanentamaintg

La firma «Zaunteam» furnescha a Giovanoli igls elemaints dallas seivs scu giavischias digls clients. Cugls sies collaboratours segna el alloura per la montascha dalla seiv. Igl sortimaint dallas seivs è fitg vast ed el vign permanentamaintg er agiunto cun las pi novas seivs tgi vignan sen la fiera. Da retrer èn tar l’interpresa «Zaunteam» seivs per anturn tgesa, da chellas pigl iert, plazs da sport ed er da chellas per circumdar en bietg d’ena firma cun en material pi stabil. I mantgan pero er betg seivs per animals, seivs per territoris pi spundeivs e seivs tgi vignan duvradas angal per la siertad persunala. Gronda peisa vign alloura er dada all’optica cun integrar la seiv tant scu pussebel aint igl conturn.

Gio gia pulit lavour

Hugo Giovanoli menziunescha tgi anfignen ossa seia el cuntaint cugls affars. Cun la firma «Zaunteam» collaborescha el siva dad en onn. La dumonda per da tottas sorts seivs seia avant mang. Gia da montar seivs vegia el pitost an regiuns pi bassas digl Grischun central ed er dalla Nagiadegna. A Son Murezza e conturn vignan pero montadas bleras seivs, gist seivs da siertad per proprietaris da villas. La firma «Zaunteam» fò digl reminent er ischs da trer e chegl an tottas grondezzas e fermezzas. Ena bela lavour vegia el gia a Samedan tar la staziun dalla Veiadafier retica noua tg’ins ò fatg ena seiv da crap er pigl maletg dalla staziun. Cuntaint è igl om da Beiva er tgi an Val Alvra ed an Surses ins canoscha planget la firma «Zaunteam». Igl biro digl travagl e digl luvratori a Beiva ò Giovanoli construia cun lenna indigena tgi el ò retratg dalla rezgia da Tinizong.