Difficil da chattar persunas ingaschadas

DA BENEDICT STECHER / ANR

Davo üna prelecziun our da la collecziun da poesias da Willi Joos da Vnà cun Anna-Maria Vital ha gnü lö la radunanza da la società. Ils respunsabels han pudü preschantar ün on cun üna richa schelta culturala e cun ün quint equilibrà. In seis rapport annual ha il president da la Società Center cultural Baselgia San Niclà, Jachen Erni, orientà davart l’andamaint da l’on passà. Dürant l’on 2018 sun gnüdas organisadas diversas occurrenzas chi han chattà grond interess. «Displaschaivelmaing vaina eir stuvü tour cumgià dürant l’on da gestiun da commembers fidels chi’ns han bandunà per adüna, dad els laina tour cumgià in üna minuta da silenzi», ha dit Erni. Grazcha a differentas entradas, però eir sortidas es il nomer da commembers chalà sün 365. La situaziun finanziala da la società es allegraivla. Pro entradas da bundant 24 900 francs e sortidas da 25 100 francs muossa il quint üna pitschna perdita da s-chars 200 francs. «La buna partecipaziun a las occurrenzas sco eir la bainvuglientscha da diversas persunas ed instituziuns chi han fat donaziuns generusas han influenzà il bun resultat considerabelmaing», ha manjà il president. Ils revisuors da quint sun da l’avis cha la situaziun finanziala da la società saja sana. L’on passà sun gnüdas spostadas las elecziuns da la suprastanza causa mancanza d’interessats. La suprastanza vaiva demischiunà in globo, pero istess decis da far amo inavant ün on. «No sperain da chattar quist on persunas chi sun prontas da surtour respunsabiltà per manar inavant la società. Schi nu reuschischa da chattar glieud interessada schi nu rest’oter sco da schoglier la società.«

Prelecziun da poesias da Willi Joos

Anna-Maria Vital ha prelet our da la collecziun da poesias da Willi Joos da Vnà. Quellas reflettan evenimaints ed observaziuns chi sun nadas our da la vita da l’autur e quintan d’aventüras vivüdas. Las poesias sun selecziunadas in möd chi dessan intimar da surrier, ma eir da reflettar. La prelecziun es gnüda accumpagnada musicalmaing da Christine Wetter süll’arfa celtica. Ella ha fat quai in möd fich decent e cul sentimaint dumandà per dar als pleds daplü pais. Vital ha prelet in ün bun tudais-ch da scrittüra e cun üna buna intunaziun: «Eu sez quà illa glüm sblacha e giod il chod fin cha’l sulai es stüz. I’l vent paschaivel ballan las muos-chas ed i’l sulai sco schi nu pudessan avair avuonda e meis impissamaints tscherchan ün immaint da la vita. Ils splerins svoulan tras l’ajer e chattan las plü pitschnas fluors in tuot l’ambiaint.» Sco cha Joos ha declerà til vegnan adimaint ils temas per sias poesias dapertuot: «Minchatant cun ir a spass, ma eir in mumaints quiets e perfin dürant la lavur. Tschertüns sun subit preschaints ed oters douvran plü lönch fin chi sun sül palperi.»