Ina cursa da currer sco lavur da matura

(rtr) La gimnasiasta Svenja Ammann da Tarasp organisescha sco lavur da matura la cursa da currer «Tras Scuol». La gronda passiun dad Ammann è il sport da currer. Dapi in pèr onns e quai il hobi da la gimnasiasta da 17 onns ed ella sa participescha era regularmain a cursas da currer. L’enviern fa ella passlung. Fascinada da la cursa da stad a Scuol, da la quala ella ha fatg part avant quatter onns per l’emprima giada, ha ella cumenzà dad organisar sezza ina cursa. Ina cursa da set, respectiv da trais kilometers e mez atras Scuol. La cursa «Tras Scuol» è alura er il num da la lavur da matura che Ammann ha fatg. Per che la cursa gartegia dovri dapli che mo il termin per la cursa. Avant che Ammann ha insumma pudì cumenzar cun l’organisaziun da la cursa ha ella stuì avair differents permiss. Ella ha per exempel stuì dumandar la vischnanca da Scuol per lubientscha. Alura è ella ida a la tschertga da sponsurs, dad insatgi che mesira il temp e per finir anc per voluntaris che gidan sin il traject sco era en l’ustaria da festa. Il gudogn da la cursa che ha lieu ils 8 da zercladur a Scuol va a favur da la Fundaziun svizra per il cor.