Gronda participaziun 
al marsch 
da malencurada

3500 persunas hajan participà al marsch ch’è vegnì organisà la dumengia a Cuira per il buob da 14 onns ch’è sa disgrazià durant il «Maiensäss». Quai communitgescha il cussegl da la citad. Las persunas èn vegnidas ensemen a las 17.00 ed èn lura chaminadas cun chandailas e fotografias dal buob da la Halla da la citad da Cuira tras la citad veglia fin a la Quaderwiese. Là han lura amis da la famiglia e conscolaras e conscolars dal buob drizzà pleds da confiert a la famiglia en cordoli. Enconuschents da la famiglia dal buob avevan appellà al marsch da malencurada. La gievgia passada era il buob da 14 onns crudà var 200 meters d’ina spunda taissa giu cun turnar a chasa dal «Maiensäss».

Ils signals per la stagiun da stad sajan buns, quai scriva l’Institut da perscrutaziun da la conjunctura KOF en sia nova prognosa per il turissem. Ils buns resultats dal turissem svizzer l’enviern passà pudessan cuntinuar la stad che vegn. Per l’entir onn 2019 spetga l’institut radund 1,5% dapli pernottaziuns.

La Cuppa Spengler ha annunzià il glindesdi las sis equipas per la 93avla ediziun dal turnier da tradiziun tranter Nadal e Bumaun. Sper l’equipa finlandaisa TPS Turku, il campiun da la Tschechia, Ocelari Trinec, vegn era Salavat Yulaef Ufa da la Russia a dar ses comeback sin glatsch svizzer. Da la partida èn natiralmain era las duas equipas da tradiziun, il Club da hockey da Tavau ed il Team Canada sco er ils Tessinais d’Ambri-Piotta.