Ospitants generus

(anr/gns) Il di dal Tir champester è gia dapi decennis tradiziun ch’ina delegaziun da l’Uniun chantunala da tir, represchentants da la politica e da l’armada van a visitar in travagl da tir. Alternont va la delegaziun d’onn tar onn en in’autra regiun per mussar l’attaschadadad envers ils organisaturs da la pli gronda festa da tir dal mund. Quest onn è la delegaziun cun Tina Gartmann-Albin, la presidenta dal cussegl grond, Carl Frischknecht, il president dals tiradurs grischuns, divisiunari Lucas Caduff, cumandant da la Divisiun territoriala 3 e Martin Bühler, il manader da l’uffizi da militar e schurmetg civil stads cun anc auters giasts a Müstair. Al stan da tir Chalavaina è la delegaziun vegnida beneventada da Rico Lamprecht, il president communal da Müstair, e da Silvio Pitsch, il president dal District da tir Val Müstair. Omadus èn sa mussads loschs da la visita dad uschè bleras persunas dal tir, da la politica e dal militar. Frischknecht ha ditg che la tradiziun dal tir e cunzunt dal Tir champester vivia er en las regiuns periferas. Ad el sco president fetschia quai grond plaschair. Ils Jauers èn lura er stads ospitants generus, uschia ch’er la buna cumpagnia n’ha betg mancà. Ils giasts han lura er prendì bler temp per in discurs cun ils tiradurs da la Val Müstair ed han er guardà co che quels han tratg ils 18 culps sin la distanza da 300 meters e sin la distanza da 
25 meters.