Ueli e Linetta Krebs han trat il melgder

Da Flurin Andry / ANR

Ad Ueli Krebs da Sent esa gratià al Tir champester ad Urezzas da trar cul schluppet sün 300 meters cun 72 puncts il maximum. El es ün dals 39 tregants in Svizra chi han gnü ingon uschè üna buna mera. Minch’on vegnan realisats in Svizra in tuot las parts dal pajais ils tirs champesters. A quels da quist on han tut part var 130 000 persunas. In venderdi saira, sonda e dumengia es quai stat il cas eir pro l’implant da tir Urezzas chi’d es situà tanter Scuol ed Ardez. «Ingon s’han partecipats 233 tregantas e tregants da l’Engiadina Bassa», disch Ueli Krebs, il president da la Società da tregants Sent. Quista società es dvantada illa disciplina gruppas i’ls ons 1992 e 2004 champiuns svizzers. «A noss juniors es quai gratià da l’on 1996», manzuna’l. Trar a schaibgia ha a Sent lunga tradiziun, «als tregants da Sent as cugnuoscha in tuot la Svizra», perquai ha la società tgnü seis nom. Al Tir champester da la fin d’eivna passada han tut part tregantas e tregants da tuot il District da tir Engiadina Bassa, dimena da Zernez fin Samignun. Il president da quist district es Eduard Lehner.

«Be in venderdi 
saira ün pa vent»

Il Tir champester ha gnü lö ad Urezzas. Quist implant da tir es gnü fabrichà da l’on 1992 cumünaivelmaing, «avant la fusiun al cumün da Scuol», dals ses cumüns da Sent fin Guarda. «Daspö l’on 1993 traina in quist implant», declera Krebs, «plü bod vaiva mincha cumün ün’aigna società da tregants, causa chi’d es difficil da chattar glieud pellas differentas caricas sun üna davo tschella gnüdas scholtas, uschè chi’d es uossa be plü quella da Sent, però cun tregants da tuot las fracziuns da Scuol.» Las relaziuns pel Tir champester ad Urezzas sun stattas la fin d’eivna passada fich bunas: «In venderdi saira d’eira amo ün pa vent, in sonda e dumengia però esa stat ideal per trar», disch Krebs. Quai as vezza eir schi’s guarda la glista da rangaziun: A blers dals tregants e las tregantas esa gratià da far fich buns resultats, saja quai illa disciplina 300 meters cul schluppet sco eir in quella da 25 meters culla pistola.

Da Sent, Zernez 
e Samignun

Ils vendschaders da la concurrenza cul schluppet sun Ueli Krebs chi ha trat il maximum, nempe 72 puncts. Seguond es gnü Urs Luzi da la Società da tregants da Zernez e terz Marco Zegg dal Schiessverein Samnaun. La megldra treganta sülla distanza da 300 meters es statta sco 22avla Linetta Krebs, la conjugala dal president da la Società da tregants da Sent. La seguonda da las duonnas es gnüda sco 23avla Clara Mayer e la terza sco 32avla Lorena Priuli, tuottas trais da la Società da tregants da Sent. Il meglder junior U21 es stat Duri Luzi da Zernez, eir el da la Società da tregants Sent. Quasi il maximum culla pistola ha trat il vendschader Curdin Florineth, nempe 177 da 180 puncts pussibels. Seguond es gnü Eduard Lehner, tuots duos da la società da Sent. Il terz rang ha ragiunt Peder Caviezel da la Società da tregants Tschlin-Strada-Martina. Eir da quella società es Natalia Schlegel chi’d es gnüda quarta, uschè ha ella trat il plü bain da las duonnas. La prüma dals juniors pro’l trar culla pistola e es gnüda Bigna Florineth da la Società da tregants Sent.