Punt Crap Gries – ussa ufficialmein

dad Augustin Beeli / anr

Avon strusch dus onns han las vischnauncas Ilanz/Glion e Schluein, ensemen cul Consorzi da serenera Foppa e l’uniun Ruinaulta, inaugurau la punt sul Rein. Ils scolars d’omisduas vischnauncas han astgau separticipar ad ina concurrenza pil num. Ier han els inaugurau la tabla cul num «punt Crap Gries». Las specificaziuns tecnicas ein indicadas suandontamein: peisa 94 tonnas; lunghezia: 99 m; ladezia dus m; purtada: 440 kg/m2. La tabla en colur da bronz muossa ina grafica dall’entira punt. Cu els hagien baghegiau quella la stad 2016 menavi il Rein considerablamein dameins aua, ha igl inschignier Claudio Casutt raquintau avon la punt. L’aura schetga ei stada d’avantatg per baghegiar quella. Ier cuort avon miezgi ein 12 affons da Schluein e 20 dalla scola da Castrisch stai silla punt. Els ein separticipai all’inauguraziun dalla tabla. Dus onns avon havevan els era priu part dall’inauguraziun ufficiala d’in implont ch’avischina la populaziun dils vitgs da Schluein e Castrisch. Cun quel hagi la populaziun retschiert novas pusseivladads, la punt survescha alla communicaziun e levgiescha ils contacts, ha la presidenta communala dad Ilanz/Glion, Carmelia Maissen, declarau als presents.

Proposta: punt SchluCa

«Ussa maunca mo aunc il num» fuva la reportascha dall’inauguraziun ils 3 da fenadur 2017 en LQ titulada. «Nus sperein che vus fetschies stediamein diever dalla punt, per ir a spass, per dar balla el stadiun, per visitar amitgs sul Rein ed autras caschuns», ha il president communal da Schluein manegiau ier viers ils affons. Avon in onn han Bruno Wellinger e la presidenta communala dad Ilanz/Glion envidau las scolas da separticipar alla concurrenza per anflar il num adattau per la punt nova. Ina roscha nums ein arrivai. Oriundamein fuss ei stau previu ch’ils gremis politics d’omisduas vischnauncas elegiessen in num ufficial. Aposta per arver il radius e per examinar la fantasia dalla populaziun ei l’idea naschida d’integrar dapli persunas. La finala han las suprastonzas communala decidiu d’organisar ina concurrenza pils scolars. Las classas dallas scolas da Castrisch e da Schluein han giu tschaffen da separticipar. Els han inoltrau propostas sco «punt da cletg», «punt da ballapei», «punt nova», ed autras. In num original inoltrau ei «punt SchluCa», pia la cumbinaziun Schluein-Castrisch. La giuria hagi buca giu sempel d’eleger, ha Maissen sincerau als affons. La finala ha la giuria eligiu ina proposta che fuva gia sin meisa: Punt Crap Gries. Quei num ei uss ufficials e vegn era indicaus ellas cartas topograficas. La finala survescha quei object a biars, igl ei semussau ch’il piogn vegn duvraus fetg stedi, e quei da tuttas uras.

Christian Theus, il president dall’Uniun Ruinaulta, ei era staus presents al batten dil num ufficial. El ha confirmau ch’ins hagi realisau avon treis onns in’ovra da success. Quella punt vali sco simbol dalla collaboraziun intercommunala. Ton per habitonts da Castrisch sco per tals da Schluein eis ella daventada in implont indispensabel per traversar da tuttas uras segir e cumadeivel il Rein. Era la notg san ins duvrar quei piogn. Sch’ins s’avischina s’envida la cazzola ed illuminescha il tschancun da 90 meters. La staziun dalla Viafier retica, numerus viandonts, ciclists, famiglias cun affons pigns apprezieschan d’ir a spass traversond il Rein. Quei ch’ei aunc buc adattau ei il trutg dalla vart da Castrisch. Sco quei ch’igl inschignier e president dil Consorzi da serenera Foppa ha sincerau ei gliez aunc sin rucca.La punt nova ei accessibla dapi ils 22 da december 2016. Ella cuntegn ina massa lingias d’infrastructura, denter auter il bischel dalla canalisaziun e lingias d’electricitad.