Sherlock Holmes digl Grischun

(cp) Siva dad en onn son detectivs da hobby schluittar a Savognin ed a Beiva ainten la rolla scu cumissaris ed eir alla tschertga da fastezs e cass criminals misterious. A parteir digls 30 da matg 2019 dattigl a Savognin ed a Beiva puspe en nov cass tgi ò da neir sclaria.

Scu cumissari dalla pulizeia cantunala digl Grischun ins antscheva a Savognin ni a Beiva cun la retschertga d’en cass criminal. Aint igl li sa cattan tavlas cun indezis tgi dattan infurmaziuns tar las persungas suspectas e lour motivs pussebels. Er la sierada d’indezis duess neir consultada. Pispert tgi la cumbinella è messa ansemen ed i existan nigns dubis ple, alloura vign dumando tigl procuratour public per arrest d’inquisiziun dalla persunga suspecta. È nia catto igl dretg delinquent? A disposiziun stattan en’istorgia criminala a Savognin ed en’otra a Beiva. Igl spass da crimi ò siva da sia antschatta, igl zarcladour 2018, gio carmalo 1000 detectivs a Savognin e 300 detectivs a Beiva.

Igl nov crimi: Igl professer sparia

Noua è professer Bregn? Igl scienzio renumo viveva per sasez e perscrutava ve dad ena invenziun revoluziunara tgi stava gist avant l’avertura. Pero siva dad en pêr deis è igl professer sparia! È professer Bregn svania voluntariamaintg, è el nia rapino ni schizont assassino? Ed ò igl sies scumpareir da far ensatge cun la sia lavour?Scu cumissaris dalla pulizeia cantunala surpeglian gio bagnbod blers detectivs da hobby las retschertgas an chest cass misterious. Perchegl tgi sen basa digls fatgs dubious po betg neir sclos tgi sa tracta dad en delict.

Start e funcziun

Igl spass da crimi vign fatg online e so neir retschet sot: www.krimispass.ch/savognin u www.krimispass.ch/bivio. La participaziun è gratuita e betg colliieida cun obligaziuns. I dovra sulettamaintg en Smartphone ed ena curta registraziun. Forsa anc ensatge da screiver, percass tgi ensatgi less far notiztgas. Siva dalla registraziun ins survign en e-mail cugls lis d’acziun. Agl li d’acziun ins catta ena tavla d’indezis cun en code QR. Antras scannar igl code vign la cuntinuaziun dall’istorgia mussada segl telefonign. Tgi tgi posseda betg ena app da scannar en code QR so er dar aint direct igl link aint igl Browser digl sies telefonign. L’istorgia so neir ligeida an furma da text u per part er neir tadlada scu novitad. Uscheia ins vò dad indezi tar indezi e prova dad identifitgier igl culpant.

Spass da crimi

Iniziant digl spass da crimi è igl informaticher ed autour da hobby David Baumgartner. El ligia e screiva fitg gugent istorgias da crimi. La fegnameira è chella dad edeir mintga egn u dus onns en nov crimi per porscher agls giasts ena purscheida varionta. Ainten l’antiera Svizra dattigl 13 rutas da spass da crimi. Las veias interactivas da Savognin e Beiva èn las ampremas aint igl cantun Grischun.