Intginas surpraisas en il final

DA GION NUTEGN STGIER / ANR

Al final grischun dal tir da gruppas n’ha nagina da las 70 gruppas defendì il titel gudagnà avant in onn. Sin la distanza da 300 meters èn Favugn, Giuvaulta e Versomi ils victurs. L’unica gruppa sursilvana ch’è stada sin il podest è quella da Sedrun-Tujetsch en la categoria cun l’arma da sport. Ina giada dapli èn las relaziuns da sajettar stadas pretensiusas al stan da tir Rossboden a Cuira. Cun paucas excepziuns è lura er vegnì tratg sonda passada pli schlet che anc tar il final 2018. Adina puspè sa midava la glisch e vitiers era anc in pulit vent. Uschia èn las relaziuns stadas tut auter ch’optimalas. Da menziunar è er che da sajettar al stan da tir Rossboden è lura er ina gronda differenza envers las duas prerundas che vegnan tratgas en il stan da chasa.

Segund plaz per Sedrun-Tujetsch

Favorit en la categoria A, quella cun l’arma da sport, era Haldenstein. Quella gruppa aveva gudagnà il final avant in onn. Quest onn han ils tschintg tiradurs da Haldenstein gì dapli concurrenza cun cuntanscher «be» il terz post. Concurrenza ha il campiun grischun 2018 survegnì da Favugn e lura er da la gruppa da Sedrun-Tujetsch. Quell’aveva gudagnà las duas rundas da qualificaziun, bain savend che a Cuira tar il final cumenza tut da nov. Favugn ha dominà il final e vegnì nov campiun grischun en il champ A. Il quintet da Sedrun-Tujetsch ha terminà il final cun daventar segund, per ils Tuatschins segir in bel success. Persvas han lura er las gruppas da Laax-Falera, Ruschein, Castrisch e da l’Alvra.

Degen la meglra gruppa sursilvana

Cun l’arma da militar 57/03 eran las gruppas da Giuvaulta e Tumegl (ils davos quatter onns campiun) las favoritas per gudagnar il final. La fin finala han lura be dus puncts decidì a favur da Giuvaulta. Quella gruppa ha cunzunt en l’emprima runda tratg cun 713 puncts in resultat da vaglia er ord vista svizra. Cumplettà il podest ha qua Bregaglia, il campiun grischun 2014. Degen è cun il plaz 5 la meglra gruppa sursilvana en quel champ. Sent, Ruschein ed Alvra èn er sa qualifitgads per l’emprima runda naziunala che cumenza l’emna proxima

Surpraisa che Versomi ha gudagnà

La pli gronda surpraisa è lura succedida en il champ E, armas da militar senza la buis 57/03. Na ils favurits Monstein e Castrisch èn stads il pli sisum il podest, mabain ils tschintg tiradurs da Versomi. Fatg han els sco Monstein er 1358 puncts, dentant gì ina meglra segunda runda che la gruppa da Monstein. In’ulteriura surpraisa è bain il terz plaz dal team dad Aschera. La gruppa da Riein-Sevgein ha manchentà da vegnir sin il podest be per tschintg puncts. Castrisch, il victur 2017 e 2018, è «be» vegnì 5avel, resta tuttina il favurit per las trais rundas svizras e per far il zap en il final svizzer a Turitg. Tratg bain han però er ils umens da Duin, sco gia avant in onn.

1. Favugn I, 1910 puncts, 2. Sedrun-Tujetsch 1900, 3. Haldenstein I, 1897, 4. Haldenstein II, 1892, 5. Laax-Falera, 1889, 6. Alvra, 1888, 7. Ruschein, 1879, 8. Cuira, 1869, 9. Castrisch, 1868, 10. Haldenstein III, 1860, 11. Tavau, 1859, 12. Favugn II, 1857, 13. Puntraschigna, 1855.

1. Giuvaulta I, 1418 puncts, 2. Tumegl, 1416, 3. Bregaglia II, 1381, 4. Bregaglia I, 1379, 5. Degen, 1373, 6. Alvra, 1367, 7. Giuvaulta II, 1365, 8. Sent, 1363, 9. Aschera, 1345, 10. Ruschein, 1331.

1. Versomi, 1358 puncts, 2. Monstein, 1358 3. Aschera IV, 1355, 4. Riein-Sevgein, 1350, 5. Castrisch, 1341, 6. Samignun, 1334, 7. Aschera III, 1334, 8. Duin, 1332, 9. Tumleastga, 1331, 10. Tumegl, 1327, 11. Tavau, 1324.

(Quellas gruppas èn qualifitgadas per l’emprima runda naziunala da total trais rundas).

1. Poschiavo, 724 puncts, 2. Razén, 718, 3. Cuvlignas, 718, 4. Cuira, 718, 5. Eigias-Landquart 712.

1. Cuira, 1110 puncts, 2. Cuvlignas, 1073, 3. Eigias-Landquart, 1018, 4. Müstair, 1010, 5. Cuira UOV, 983.

reclama

La gruppa da pistolas da Cuira e quella da 300 meters da Giuvaulta cun la presidenta dal cussegl grond: Urs Solèr, Sofie Lehmann, Zora Radosavljevic, Stephan Lehmann, Tina Gartmann-Albin, Dirk Frischknecht, Mauro Ardüser, Kevin Plaz, Carl Frischknecht e Franz Josef Plaz (da san.). Fotos G. N. Stgier