Tener las hottas enta maun

dad Augustin Beeli / anr

Gie, ei constetti, la strategia da menar sez las stizuns seigi secumprovada. Quei gi il president dall’Associaziun da consum Falera-Laax, Victor Blumenthal. Ivo Speck meina da Falera anora era la stizun da Laax e la filiala a Sagogn. Cun success, malgrad gronda concurrenza. En tuts treis loghens ha la populaziun a disposiziun ina stizun cun products dil Volg. Igl onn vargau ha la gestiun vendiu rauba e products per la summa da 7 776 454 francs, quei ei pli che 750 000 francs dapli ch’igl onn precedent 2017. Victor Blumenthal menziuna ch’ins hagi priu avon treis onns la dretga decisiun strategica. Igl onn 2015 fuva l’associaziun vegnida en ina situaziun malemperneivla. Novs distributurs gronds ella regiun denter Flem e Glion havevan entschiet a catschar pulitamein a cantun las stizuns dil Volg. Lu aunc ils dus unviarns cun pauca neiv 2015/16 e 2016/2017 havevan sbassau pulitamein igl entusiassem. Avon treis onns, a caschun d’ina radunonza consultativa a Falera, han ils commembers dall’associaziun dau en il «tarif» alla suprastonza. La radunonza ha decidiu cun gronda maioritad ch’ins vegli buca dar si l’autonomia. Da lu naven eis ei iu ensi. La Fenaco honorescha l’associaziun curaschusa cun glieud curteseivla e products frestgs. Dacuort ha la direcziun surdau all’associaziun Falera-Laax il label sco stizun AAA. Las stizuns Falera, Laax e Sagogn vivan buca mo dils turists, mobein era dalla solidaritad ch’ils indigens muossan per lur stizun. Malgrad Lidl, Aldi, Coop, Migros, Landi e Spar.

pagina 3