Claudia Tomaschett, nova menadra

(anr/abc) La Casa da vegls e da tgira Glion survegn ina dunna al tgamun operativ. Ier ha la cumissiun da menaschi confirmau quei. Il president dil cussegl da fundaziun, Gerold Hafner, ha confirmau sin damonda dall’anr che la cumissiun da menaschi hagi eligiu Claudia Tomaschett-Gerth sco successura da Hanspeter Calörtscher. Quel vegn ad ir culla fin dil 2019 anticipadamein en pensiun. La nieveligida ha 53 onns, habitescha dapi biars onns cun sia famiglia a Rueun. La mumma da dus affons carschi ei sezza carschida si a Mustér. Dapi il 2011 meina ella a Glion il biro regiunal digl Uffeci social cantunal. Tomaschett ei luvrera sociala diplomada FH e mediatura da conflicts diplomada SDM. Ella ha plinavon liunga experientscha el management social e posseda ils certificats da studis avanzai CAS. Sco quei che Hafner ha declarau all’anr vegn la nova menadra ad entscheiver sia plazza l’entschatta dil 2020. Siu antecessur meina dapi 1998 la pli gronda casa da vegls e da tgira dalla Surselva. Igl onn vargau ha l’instituziun a Glion dau alloschi a 134 persunas che derivan da 14 vischnauncas sursilvanas e da Cuera. Tomaschett vegn a surprender la direcziun operativa d’ina gestiun cun 85 plazzas cumpleinas, repartidas sin 138 persunas che lavuran els divers ressorts d’ina casa da vegls e da tgira.