Umans cun impedimaints han visità Scuol

DA BENEDICT STECHER / ANR

Daspö divers ons as chattan persunas handicapadas dal Procap Engiadina e valladas dal süd i’l Bogn Engiadina a Scuol (BES) per passantar ün pêr uras da cumpagnia. Insembel culla Viafier retica ed Auto da posta organisescha il BES l’inscunter tradiziunal. Il Procap Grischun es la plü grond’organisaziun per umans cun impedimaints i’l Grischun. Quel spordscha agüd per sgüranzas socialas e per consulenza. Cun programs per temp liber sco eir cuors e sport as chatta pro’l Procap agüd cumpetent. Voul dir ün’instituziun chi’s dedichescha ad umans cun impedimaints, cun disturbis corporals o spiertals. Pro quell’instituziun chattan umans cun handicaps sustegn ed agüd. I’l center dal Procap stan il respet vicendaivel e l’integraziun.

In centers in quatter regiuns

Impedits da l’Engiadina, Poschiavo, Bergaglia e Val Müstair chattan i’ls centers a Samedan, Scuol, Poschiavo e Val Müstair la pussibiltà da viver e da lavurar suot cundiziuns optimalas. Els profitan da persunas scoladas chi han il savair e l’incletta pels bsögns dad umans cun impedimaints. Ils handicapats chattan in quels centers relaziuns optimalas per far lavuors chi correspuondan a lur pussibiltats. Ils prodots chi vegnan fats là vegnan vendüts per generar ün pa munaida. Il böt dals centers es da dar als handicapats la pussibiltà da manar üna vita independenta e da tour part parzialmaing a la vita da lur conumans. Ils centers in Engiadina e valladas dal süd dal Procap vegnan manats da Davide Compagnoni chi abita a Zuoz: «Eu n’ha meis post da lavur a Samedan e vegn sustgnü in bleras chosas da la centrala a Cuoira chi’d es respunsabla per tuot las secziuns in Grischun.»

Üna sporta chi vain 
predschada

Cunquai cha’l minchadi dal handicapats i’ls centers dal Procap sa esser monoton vegnan organisats inscunters ingio chi vegnan insembel persunas dals divers centers e giodan ün di da cumpagnia. «L’inscunter i’l BES ha minch’on lö adüna il prüm marcurdi da gün. Ils partecipants vegnan salüdats cun ün apertitiv i’l local da cultura, davo giodan els il bognar i’l BES e plü tard vegnan els maldüsats cun üna marenda cun accumpagnamaint musical», ha orientà Compagnoni. Las spaisas dal viadi chi sun a partir da desch persunas plü favuraivlas vegnan surtuttas dals partecipants. In marcurdi passà han var 70 persunas cun impedimaints tut part cun lur agüdonts a l’evenimaint i’l BES e giodü ün di in cumünanza. Il giantar vain preparà illa cuschina da l’ospidal a Scuol ed ün pêr duonnas da Scuol e contuorns spordschan sustegn pro la marenda.