En sia seduta dils 6 da zercladur 2019 ha il cussegl da vischnaunca, sut il tgamun dad Armin Berther, tractau pliras fatschentas:

– Access Fontanivas: Sanaziun ed adattaziun dalla sbuccada, project e credit

– Via Run: Credit per la cumpart dalla sanaziun dalla via e credit per la sanaziun dalla canalisaziun

– Serenera Pardomat: Project e credit

– Program d’activitad

– Plan da finanzas 2020–2024.

Il cantun Grischun ha iniziau differents projects per la sanaziun dil stradun dil Lucmagn naven da Mustér entochen al Pass dil Lucmagn. Denter auter era il tschancun naven da sum Salaplauna entochen alla punt da Fontanivas. El medem mument preveda il cantun da sanar la sbuccada dalla via che meina a Fontanivas. Grazia alla sanaziun dil stradun eis ei pusseivel da migliurar considerablamein la situaziun dalla sbuccada e digl access a Fontanivas. Il cussegl approbescha il project per la renovaziun ed adattaziun digl access a Fontanivas, conceda per quei project in credit net da 270 000 francs e suttametta quella damonda da credit el senn dallas prescripziuns digl art. 21 lit. c dalla constituziun communala al referendum facultativ. La Via Run (via da quatier) sesanfla dapi onns en in fetg schliet stan, perquei ei ina sanaziun da quella via urgenta e necessaria.

La fixaziun dall’interessenza succeda tenor las prescripziuns digl art. 63 dalla lescha davart la planisaziun dil territori dil cantun Grischun (LPT) e la procedura da contribuziun tenor las directivas dils art. 22 entochen 25 dall’ordinaziun davart la planisaziun dil territori pil cantun Grischun OPT. El rom da quellas prescripziuns ei igl intschess da contribuziun vegnius definius. Medemamein ei l’interessenza publica vegnida fixada. Quella munta en consequenza dalla procedura da contribuziun a 20% pil tschancun dalla Via Funs-Dado ed a 60% pils dus tschancuns dalla Via Run. La cumpart ch’ei da finanziar entras ils proprietaris da terren munta ad 80% per la Via Funs-Dado ed a 40% per la Via Run. Il cussegl conceda il credit da 494 800 francs per la cumpart communala vid la sanaziun dalla Via Run e dalla Via Funs-Dado ed il credit da 386 000 francs per la cumpart vid la construcziun dalla canalisaziun d’aua schubra ed il remplazzament dalla canalisaziun d’aua tschuffa e suttametta quels conclus tenor art. 21, lit. c dalla constituziun communala al referendum facultativ.

Pardomat s’auda tier las fracziuns che disponan buca d’ina purificaziun dallas auas piarsas. La realisaziun da quei project ei zuar gia in temps pendents, ei denton vegnius remess differentas gadas en favur da projects cun pli aulta prioritad. Ils 27 da settember 2010 ha igl uffeci per la natira ed igl ambient approbau il preproject per la construcziun d’ina serenera communabla e disponiu pils cuosts renconuschi ina contribuziun da 20%. Il project preveda da construir a Pardomat Dadens ina serenera communabla per omisduas uclivas da Pardomat.

La vischnaunca da Sumvitg construescha per quei intent ina canalisaziun naven da Pardomat Dado entochen tier l’emprema colligiaziun che succeda davart da Mustér. Naven dall’emprema colligiaziun a Mustér vegnan ils cuosts pil tschancun communabel reparti ulivamein sin las duas vischnauncas. Il cussegl approbescha il project per la construcziun dalla serenera e dalla canalisaziun a Pardomat, conceda per quei project in credit net da 102 500 francs e suttametta quella damonda da credit el senn dallas prescripziuns digl art. 21 lit. c dalla constituziun communala al referendum facultativ.

Plinavon ha il cussegl da vischnaunca priu enconuschientscha dil program d’activitad ed il plan da finanzas 2020–2024.

Suprastonza communala