Almain la notg sa vischinan las fracziuns

DA GION NUTEGN STGIER / ANR

La regenza, quella ha quartier en l’hotel Saratz, en quella chasa da quatter stailas nua che naginas da las fracziuns èn sut tetg. Las fracziuns han tschernì sezzas ils hotels per pernottar durant la sessiun champestra a Puntraschigna.

Per ina giada unidas: la pld e la pcd

Sch’il parlament va «ester», lura è er adina la dumonda nua che las fracziuns da las partidas han quartier? Sa vischina la pld a la pps sco quai ch’ella fa magari sin champ politic, u vegni tar ina «lètg» tranter la pcd e la pbd? Nus avain s’infurmà e cunaschain ils detagls. L’hotel Walther, ina chasa da quatter stailas che vegn gia onns manada d’ina famiglia liberala (l’anteriur patrun Christian Walther è stà blers onns deputà), porscha tetg als deputads e las deputadas da la pld. Per ina giada stattan ils cristiandemocrats en il medem hotel sco ils liberals. Quai è bain ina singularitad che las fracziuns da quellas duas partidas van per ina giada a pêr, almain quai che pertutga il pernottar.

La regenza ha quartier 
en l’hotel Saratz

En l’hotel Mulin stattan sur notg ils deputads e las deputadas da la pps. Remartgabel è che cun quella partida n’ha sco para nagin’autra fracziun vulì partir l’hotel. Persuenter è la pbd en il medem hotel sco ils socialdemocrats, vul dir tschernì han quellas duas partidas il Sporthotel sco lieu per sa revegnir dals strapatschs dal di. Er qua èn uschia sa vischinadas duas partidas ch’han strusch las medemas finamiras. La regenza, ella sa lascha ir bain e quai en l’hotel nobel Saratz, situà gist visavi il center da congress Rondo.

Notgs pli lungas

La sessiun extra muros è bain in’occurrenza nua ch’i va per affars politics, dentant è ella er in inscunter tranter indigens e deputads e deputadas. Uschia è ier saira la populaziun da Puntraschigna stada envidada ad in apero en l’hotel Saratz, en cuminanza cun il parlament chantunal e la regenza. Durant la sessiun ordvart Cuira cuzzan las notgs magari er pli ditg, savens fitg ditg. Er sche la debatta politica cumenza il di suenter punctual a las 08.15 vegn ballantscha dal di en las bars dals hotels e quai politicamain independent. Vers mesanotg s’interesseschia strusch in sche las deputadas da la ps han supplitgà las deputadas da las autras partidas da sa participar a la chauma da las dunnas da damaun venderdi, ubain pertge ch’il quint annual dal chantun serra cun in grond gudogn. La sessiun champestra è simplamain er qua per tgirar ils contacts tranter ils deputads e las deputadas ed er ils schurnalists. Tar la sessiun extra muros è simplamain tut pli lescher, pli avert e pli persunal che cur ch’il parlament s’inscuntra a Cuira en il bajetg dal cussegl grond. Singular è bain er che quest’emna vegn fatg politica nua ch’auters fan vacanzas, er sch’en il parlament è adina puspè vegnì dulzà la vusch e mussà las cornas sco ils capricorns sur Puntraschigna.