Cunvegna da basa cun la UE:
Cussegl dals chantuns vul decider

(rtr) Cun clera maioritad ha la chombra pitschna decidì da pretender dal cussegl federal ch’el mainia negoziaziuns supplementaras cun l’UE davart la cunvegna da basa. La moziun approvada pretenda tranter auter ch’il cussegl federal megliereschia la cunvegna, cunzunt davart las dumondas da la protecziun dal nivel da pajas en Svizra, la dumonda co i duai ir vinavant cun ils subsidis da chantuns e confederaziun sco er co u sche insumma la directiva per ils burgais da l’UE stoppia vegnir applitgada. Gist quels puncts haja la regenza ussa prendì si en sia brev da venderdi a la Cumissiun europeica e pretendì dapli scleriment, ha il liberaldemocrat Ruedi Noser defendì la regenza. Il cussegl federal haja uschia puspè prendì enta maun la fatschenta impurtanta. Perquai possian ins uss era renunziar sin la moziun e renviar quella. Gist quai fiss il fauss signal, ha il socialdemocrat Christian Levrat dà contra. I dettia anc adina memia bleras dumondas en connex cun la cunvegna da basa. La moziun cun las pretensiuns stoppia perquai vegnir acceptada per uschia dar sustegn al cussegl federal en sias discussiuns cun l’UE e dar in signal ferm en direcziun Brüssel. Da simplamain spetgar sin il proxim pass saja dentant fitg malsegir, ha il cristiandemocrat Filippo Lombardi respundì. Il mender che pudess schabegiar saja che la cunvegna fetschia en il parlament u il pli tard a l’urna naufragi. En la votaziun han lura 
er quels arguments persvadì ina clera maioritad da la xhombra pitschna.