Marchet Notegen daventa nov manader da scola

Marchet Notegen da Tschlin daventa nov manader da la Scola professiunala artisanala Surselva. Quai communitgescha la Regiun Surselva. Notegen ha 32 onns e lavura gia dapi tschintg onns sco scolast a la Scola professiunala artisanala Surselva. El ha studegià istorgia e politica a l’Universitad da Berna ed ha fatg diploms per la scola media e la scola professiunala a Turitg. Notegen succeda ad Alois Derungs ch’ha abditgà sco manader, che vegn dentant ad instruir vinavant sco scolast dal rom per ils scrinaris e sco scolast per la furmaziun generala.

Da la collisiun scriva l’Uffizi da chatscha e pestga chantunal. La collisiun tranter il luf e l’auto saja capitada la notg da la sonda sin la dumengia sin il Pass dal Güglia, en il territori da l’Alp Sur Gonda. La collisiun è vegnida annunziada immediatamain. Il guardiaselvaschina che saja vegnì clamà al lieu da l’accident haja stuì mazzar l’animal grevamain blessà. Tenor la communicaziun da l’uffizi na saja betg enconuschent danunder ch’il luf derivia. Il cadaver vegnia surdà uss a l’institut da patologia da l’Universitad da Berna per far ulteriuras controllas. Là vegn il luf er analisà geneticamain per eruir danunder ch’el deriva.

Amazon è per l’emprima giada a la testa da las marcas las pli custaivlas dal mund. Il commerziant online e da tecnologia ha laschà per l’emprima giada davos el ils concerns dad Apple e Google. La firma da perscrutaziun dal martgà Kantar ha evaluà per Amazon ina valur da 315,5 milliardas dollars.Cumpareglià cun l’onn passà è quai in augment da 52%. Tenor il studi vala la marca Apple 309,5 milliardas dollars e Google vala 309 milliardas dollars.