Rectificaziun

Il nov president da la «Surselva Romontscha» inditgescha a la fin da sia intervista concernent ils Rumantschs dal Plaun il sequent: «Nus havein gia igl onn vargau fatg emprovas da migliurar la situaziun. Nos partenaris ed amitgs el Plaun prendan semplamein buca posiziun. Differentas gadas havein nus fatg amogna discuors e sentupadas, denton senza success. Sin meisa ei l’idea dalla separaziun.» Ils fatgs èn ils suandants: Suenter ch’il Plaun n’è betg represchentà pli dapi in pèr onns en la «Surselva Romontscha» han ils represchentants da las uniuns localas da Flem, Trin e Domat inoltrà il schaner 2018 il giavisch a la Lia Rumantscha dad esser represchentads directamain en quella sco Uniun cun tgira dal territori dal Plaun. Ils 24 da settember 2018 ha la LR envidà cun in «doodle» ad ina seduta en chaussa separaziun da la regiun Il Plaun da la «Surselva Romontscha». Questa sesida ha gì lieu ils 14 da november 2018. Da quella ha er l’anteriur president da la «Surselva Romontscha» fatg part. Tenor la notizia d’acta da questa reuniun è vegnì decidì: «3. Proxims pass. Johannes Flury propona ina gruppa da trais persunas (Plaun + SR + LR) che duai proponer ina schliaziun per mauns da l’entira gruppa. La LR vegn a preparar in sboz cun in’idea pussaivla. Il pli tard enfin la radunanza da delegadAs dals 26-10-2019 duai la proposta ir en votaziun tar las delegadas ed ils delegads.» Dapi lura n’han ils responsabels da las uniuns correspundentas udì nagut pli da la LR. Da la «Surselva Romontscha» n’avain nus insumma mai udì insatge, damai tut auter che «Differentas gadas». Il nov president constatescha cun raschun ch’ils vitgs dal Plaun faschevan part da la Romania e Renania. Ma la Romania cumpigliava er «la part catolica dalla Surselva e dil Plaun», e la Renania Flem, Trin e la Sutselva e las vischnancas refurmadas da la Surselva. La «Surselva Romontscha» na cuntinuescha pia ni en ses num ni en ses fatgs las duas uniuns oriundas. Las vischnancas da la Regiun dal Plaun n’èn damai betg represchentadas pli entaifer la Lia Rumantscha e vegnan perquai a far il pussaivel per cuntanscher ina represchentaziun commensurada.Acziun Rumantscha Domat

Cuminonza Romontscha Flem

Cuminonza Romontscha Trin