Gia da veir en substitut pigl tor «Bond»

DA GION NUTEGN STGIER / ANR

Prest 3000 persungas èn stadas perdetga dalla dominanza d’Armon Orlik. La sia bilantscha: seis cumbats e seis victorgias. Tensiun è damai stada paca, persiva vess l’ambianza betg savia esser miglra. Anc mai ins ò vasia tants Surmirans tar ena festa da lotga scu dumengia passada a Tgazzas. Per la 6avla geda ò igl Club da lotga Muntogna organiso la Festa da lotga grischuna-glarunesa. Gia li ò chella a Tgazzas gist dasper la scola, cun la clostra scu culissa singulara. Cun aveir chest onn li alla fegn d’avost la Festa da lotga federala a Zug è igl interess per la lotga anc bler pi grond. Er dumengia passada èn igls ameis dalla lotga nias an rotscha. Crudo an îgl è tgi adegna daples giovens on interess da vurdar scu tgi igls «noschs» cumbattan aint igl razgem per onour e glorgia. A Tgazzas ins ò alloura er vasia fitg bleras donnas e da chellas bleras mattas giovnas, er ellas tg’èn neidas per assister alla festa da sport. I para tgi er an Surmeir è da preschaint igl sport da lotga fitg popular, pertge tantas persungas da nossa regiun scu dumengia passada tar l’occurrenza da lotga ins ò anc mai vasia tar ena festa da lotga. L’egn u l’oter cunascheva bagn betg las reglas dalla lotga, sa divertia èn pero tots cun esser l’atmosfera eneda daple geniala e paschevla scu usito tar ena festa da lotga. Antupo ins ò er da Surmeir alloura veirs experts tgi canoschan mintga noziun digl sport da lotga ed er mintga tgap tg’en lutgadour fò.

Sainza Daniel Bösch e Samuel Giger

Dalla parteida èn stos 130 lutgadours da tots igls cantuns dalla Svizra orientala e varsaquants dalla Svizra centrala. Mantgea ò la tensiun er en po cun renunztgier Daniel Bösch e Samuel Giger, igls dus pi ferms concurrents d’Armon Orlik, all’occurrenza da dumengia passada a Tgazzas. Bösch è gio sa participo a plessas festas da lotga cantunalas chesta stad e Giger, el tg’era bagn annunztgia, ò pero a curta vista gia da deir giu cun esser la sia blessura (spadla) anc betg digl tottafatg curada. Igls ameis dalla lotga èn bagn stos en po desillisiunos tgi chels dus sportists eran betg preschaints. Cun els dus vess Orlik aglmanc gia ena concurrenza, ma cun el esser schi an furma vessan bagn er igl mazler digl cantun Son Giagl ed igl legnamer digl cantun Turgovia gia da «morder» per frenar igl lutgadour grischun.

Treis gedas la nota maximala

Armon Orlik ò gudagnea dumengia passada per la 4. geda an seria la Festa da lotga grischuna-glarunesa. La victorgia a Tgazzas è er stada pigl Sursilvan la quarta dalla staschung 2019, cugl punct culminont alla fegn d’avost a Zug. A Tgazzas ò AOrlik musso la sia gronda classa, tg’el totga tar egn digls favorits per daventar rètg-lutgadour 2019 an bung dus meis e tg’el è igl mument igl nomer egn digls lutgadours dalla Svizra digl nordost. Seis victorgias da fila a Tgazzas e chegl treis gedas cun la nota maximala da 10 puncts e treis gedas cun la nota da 9.75 puncts. La lotga finala cunter Sandro Schlegel ò angal cuzzo dus minutas. Per el ed er igls miglers lutgadours igl nordost dalla Svizra stat igls 30 da zarcladour 2019 segl program la festa da lotga «NOS» e chegl a Hallau SH.

En quart punct ò mantgea

La fegnameira da mintga lutgadour è da far igl «cranz» er tar ena festa da lotga cantunala. Per sa participar alla festa da lotga naziunala sto en lutgadour aglmanc aveir chel onn aint igl sies «palmarès» en’occurrenza noua tg’el ò fatg igl «cranz». Dasper Orlik on gist anc tschintg lutgadours grischuns retschet chel tschapel desidero. Mantganto angal per en quart punct da far igl «cranz» ò Andrin Poltera, igl lutgadour surmiran tgi stat ad Urnäsch. Igl è ossa la terza geda tg’el mantgainta angal per en quart punct da far igl «cranz» tg’el duvress per pudeir eir a Zug. El seia da buna speranza tgi chegl gartegia anc ainten las proximas emdas cunzont tar la Festa da lotga appenzellesa. Da menziunar è tgi a Tgazzas ò Poltera angal pers ena lotga da seis, e chegl cunter Christian Biäsch da Tavo. Treis cumbats ò igl corvatetgs e passiuno catscheder (vo a Savognin a tgatscha) gudagnea e dus gedas è nia scretg per el segl figl da notas en pari cun las notas 9.00 ed 8.75.

«Hexer» anstagl «Bond»

Tar ena festa da lotga è tradiziun tgi igls amprems treis survignan er en prietsch spezial, vot deir en animal. Igl victour gudogna adegna en tor ed igls oters dus tg’èn segl podest en armaint u er en tgaval. Er a Tgazzas ògl do per Orlik en tor, pero betg igl tor «Bond» digl pour Armin Zimmermann da Tgazzas, mabagn igl tor «Hexer» tgi dereiva digl madem bagn puril. La raschung tgi igl tor «Bond» (1000 kg e da treis onns) ò betg savia neir surdo agl victour da festa è tgi avant curt è igl animal sa blesso e rot en schanugl. Uscheia èn igls organisatours dalla festa a Tgazzas stos ranviias agl tor «Hexer», en animal d’en onn a mez cun en peis da 600 kg. Naturalmaintg tgi Orlik ò betg piglia a tgesa igl tor «Hexer», mabagn laschea chel agl pour, e piglia igl premi an furma da daners (valeta digl tor ca. 3000 francs). Igl ple è chegl igl cass tar tot las festas da lotga tgi igl victour renunztga da piglier cun el igl tor. Tar en armaint u en tgaval è pi tgunsch usito tgi gist en pour e lutgadour peglia anc gugent igl premi natural e renunztga alla somma dalla valeta digls tiers.