Ün di cun blera musica e bels inscunters

DA BENEDICT STECHER / ANR

Il novavel inscunter da las scolaras e’ls scolars da la Scoula da musica Engiadina Bassa/Val Müstair cun lur magisters ha gnü lö quist on a Zernez. In tschinch lös d‘acziun i’l center dal cumün han las differentas gruppas muossà lur abiltà musicala. La Scoula da musica Engiadina Bassa/Val Müstair (EBVM) es fich activa e s’ha preschantada in sonda passada a Zernez a lur inscunter tradiziunal «Ün cumün resuna». L’evenimaint spordscha a las scolaras e’ls scolars la pussibiltà da’s pudair preschantar ad ün vast public e muossar a lur genituors, fradgliuns e paraints lur savair musical. L’arrandschamaint muossa eir impreschiunantamaing la gronda paletta d’instrumaints chi vegnan instruits a la Scoula da musica EBVM. Sper la pussibiltà d’imprender a sunar instrumaints vain sporta i’ls ultims ons eir la pussibiltà da tour lecziuns da chant. «Ün cumün resuna» es gnü organisà per la novavla jada, quist on a Zernez. L’ultima ediziun ha gnü lö l’on passà a Fuldera e l’on avant in Samignun. Las rapreschantaziuns dan als scolars ils impuls bsögnaivels per impuonder amo daplü temp illa musica e per ragiundscher ün livel musical amo plü ot. Il proget es dvantà fich popular e muossa che chi’d es pussibel cun plaschair per la musica e cun magisters bain scolats.

Il manader da la Scoula da musica EBVM, Roberto Donchi, maina la scoula fingià divers ons ed ha in quel temp recrutà magistras e magisters cul grond dun da chattar la dretta via per lur lavur culs scolars affidats. Sco cha Donchi ha dit s’improuva adüna darcheu da spordscher nouvas pussibiltats, per exaimpel l’instrucziun da las gruppas da rock e da pop. «Per no es l’evenimaint fich important per muossar a genituors ed a la populaziun nossa filosofia.

No vain uschè eir la pussibiltà da far reclama per nossa scoula», es Donchi persvas. La glieud da la regiun ed impustüt eventuals futurs scolarins vezzan che pussibiltats chi vegnan sportas. «Nossa scoula dispuona da 27 magistras e magisters e dombra bundant 500 scolars chi vegnan instruits in 12 lös da la regiun», ha orientà il manader. La scoula da musica vain sustgnüda da la società da promoziun. Quella es gnüda fundada in schner 2011 e vain manada da Jonpeider Strimer dad Ardez. La società sustegna la scoula pro progets, arrandschamaints ed evenimaints, ma eir pro concerts da gala «ün cumün resuna» e pro la cumprita d’instrumaints. Ella güda eir pro sustegns finanzials socials per famiglias.

Acziun in tschinch lös 
i’l center da Zernez

In sonda passada s’han preschantadas diversas gruppas da scolars in tschinch lös i’l center dal cumün da Zernez. Illa cuort dal chastè da Zernez s’haja dudi instrumaints da tola, da percussiuns, instrumaints da lain ed orgels da man. Pro’l Hotel Spöl instrumaints da tola e da lain, marimbas ed orgels da man. Pro la chasa da scoula d’eiran las gruppas da chant, da rock e da pop cun gronda installaziun d’amplifichaduors.

Illa chasa cumünala suns e tuns plü loms cun clavazin ed illa baselgia guitarras, gïas, cellos, instrumaints da lain e clavazin. Süllas plazzas our i’l liber d’eira eir organisà il star bain cun üna restoraziun cul Cor masdà Zernez, Società da gimnastas Zernez e cul Hotel Spöl. Pro las gruppas chi s’han preschantadas a Zernez d’eiran eir adüna preschaints ils magisters da la scoula da musica chi han pisserà cha’l program defini gnia accumpli. L’arrandschamaint es stat fich bain visità ed ils preschaints s’han pudü atschertar da la buna lavur chi vain prestada a favur da la musica.