Avanzament da rodund dus milliuns

(cp) Ils 19 da zercladur 2019 ha il parlament communal approbau il rapport da gestiun ed il quen annual 2018 dalla vischnaunca Ilanz/Glion. Il quen current siara cun in surpli d’entradas da rodund dus milliuns francs, budgetau era aunc ina sperdita da 50 000 francs. Las expensas previdas ein vegnidas tenidas en, tgei che demuossa ina buna disciplina d’expensas. Attribuiu a quei success ordvart legreivel han denter auter entradas extraordinarias da taglias sin las entradas e sin la facultad sco era fetg aultas taglias sin il gudogn ord la vendita da terren e taglias sin midadas da possess. L’atgna finanziaziun dallas investiziuns ei l’emprema gada dapi la fusiun buna cun ina valeta da rundau 82 pertschien. Quei munta ch’ins ha saviu finanziar cun agens mieds varga 80 pertschien dallas investiziuns. Simon Osterwalder, president CA, e Kevin Brunold, meinafatschenta dalla Surselva Turissem SA, han presentau a moda impressiunonta las incumbensas ed activitads da fatschenta. Osterwalder ha surpriu igl 1. da schaner 2019 la successiun da Marcus Caduff. Brunold ha surpriu la funcziun da meinafatschenta igl 1. d’avrel 2019. La Surselva metta cun la Ruinaulta, il marcau historicamein impurtont da Glion sco center per las valladas vischinontas e la buna colligiaziun da traffic a disposiziun in grond potenzial turistic. La destinaziun turistica dispona sur ed ei circumdada d’ina gronda purschida sco era d’ulteriuras destinaziuns che cumpleteschan la purschida e porschan in surpli da valeta significont.

L’incumbensa Brändli Capaul pertuccont strategia d’immobilias e l’incumbensa Quinter pertuccont investa ellas actas ein vegnidas surdadas dil parlament communal Ilanz/Glion. La suprastonza communala vegn ad elaborar ina strategia d’immobilias cun igl intent da rispunder all’incumbensa. L’incumbensa Quinter pretenda ina prolungaziun dall’investa ellas actas da diesch sin vegn gis. Il biro parlamentar propona in’adattaziun dall’ordinaziun dil parlament communal dalla vischnaunca Ilanz/Glion.

Sper il quen annual 2018 dalla vischnaunca ha il parlament era approbau ils quens annuals dallas meglieraziuns da Pigniu e Schnaus/Strada sco era dil provediment d’aua Foppa.

Da Mirco Duff da Glion, ch’ei dapi igl onn 2013 commember dil parlament, ei vegniu priu cumiau. Siu successur naven dalla proxima sesida ei Manuel Montalta da Glion.

La proxima sesida dil parlament ha liug ils 26 d’uost 2019 allas 19.00 ella sala dalla Casa Cumin a Glion.