Duas equipas promovidas – 
duas equipas relegadas

Da Hans Huonder / anr

Il campiunadi da ballapei regiunal 2018/19 ei terminaus. Ord vesta sursilvana eis el staus fetg differents. Pils ins in success cumplein e per part nunspitgau, pils auters ina trumpada. Ella davosa runda dil campiunadi ha Schluein Glion segirau igl emprem plaz ella gruppa 1 dalla 3. ligia. Grazia a quei success sa la squadra dil trenader Alessandro Giacomelli dar la stagiun vegnenta ella 2. ligia regiunala. La promoziun ei vegnida pli baul che spitgau dils responsabels dall’Uniun sportiva Schluein Glion. «Malgrad tut, nus havein da spiarder nuot igl onn vegnent ella 2. ligia», di il president Vendelin Cabernard. Avon che curdar la primavera 2017 ella 3. Ligia haveva Schluein Glion gia absolviu quater stagiuns ella 2. ligia regiunala. Meins grond success ha il Club da ballapei Lumnezia giu ella 3. ligia. In onn suenter la promoziun suonda gia la relegaziun. Ils davos onns ei quei stau per gronda part la regla tier las equipas ch’ein vegnidas promovidas dalla 4. ella 3. ligia ed aschia ha ei era tuccau Lumnezia. L’equipa da Giacun Vinzens ha mussau entgins fetg buns giugs igl atun, mo vonzeivi ei il vierm staus en. Leutier ein blessuras vegnidas ed aschia la spirala negativa cun pliras partidas sperdidas cun sulettamein in gol differenza.

Trun/Rabius anavos en 3. ligia

Empau surprendenta ei era la promoziun da Trun/Rabius ella 3. ligia vegnida, buc il pli davos perquei che Schlarigna ha dominau claramein il campiunadi igl atun vargau. Ditg ha ei viu ora sco sch’ils Engiadines massien senza gronda concurrenza dalla 4. ella 3. ligia. La finfinala ha Schlarigna mussau fleivlezias la primavera ed ha schau scher in tschuppel puncts. Tut auter Trun/Rabius: In campiunadi solid igl atun ed in fetg bien la primavera. La finfinala ha in sulet punct decidiu il campiunadi en favur dalla squadra dil trenader Mario Solèr. Mo era en quella ligia sto in’equipa sursilvana prender la via en ina ligia pli bassa. Suenter in onn 4. ligia retuorna Laax ella 5. ligia. Dils 18 giugs da campiunadi ei in sulet vegnius gudignaus.

Ella gruppa 2 dalla 5. ligia ha Orion Cuera dominau claramein il campiunadi ed ascenda aschia ella 4. ligia. La squadra dalla capitala grischuna ha spiars gnanc in soli giug. Ellas 15 partidas ha ei dau 13 victorias e dus remis. Megliera equipa sursilvana en quella ligia ei Sedrun/Mustér che contonscha il secund rang final.

La squadra da damas dall’Uniun sportiva Schluein Glion ha contonschiu il bien tierz rang ella 4. ligia. Il campiunadi ei vegnius dominaus claramein da Cuera 97.

Juniors cun bunas prestaziuns

La stagiun da ballapei vargada ei la Surselva stada representada el campiunadi dils juniors en tuttas categorias da vegliadetgna. Las equipas han mussau trasatras bunas entochen fetg bunas prestaziuns. Il punct culminont ei segiramein la promoziun dils juniors B dalla categoria promoziun ella ligia da Coca Cola dall’Associaziun svizra da ballapei. Aunc mai ei in’equipa da juniors sursilvana stada en ina categoria aschi aulta. En quella san ils Sursilvans semesirar cun las meglieras equipas svizras. L’equipa consista da Fabio Casanova (Lumnezia, goli), Mattia Büchler (Schluein Glion, goli), Renato Ascenso dos Santos (Schluein Glion, defensiun), Fadri Muoth (Danis-Tavanasa, defensiun), Sani Caduff (Schluein Glion, defensiun), Kai Strimer (Schluein Glion, defensiun), Yves Wellinger (Schluein Glion, defensiun), Daniel Martins (Schluein Glion, amiez), Alessio Schmed (Trun/Rabius, amiez, capitani), Nico D’Atria (Schluein Glion, amiez), Andriu Alig (Lumnezia, amiez), Josa Capeder (Schluein Glion, amiez), Alex Miguel Neves Lopes (Schluein Glion, amiez), Sattar Afzali (Schluein Glion, amiez), Marlo Cavegn (Laax, amiez), Luca Stabile (Schluein Glion, amiez), Mias Erni (Laax, amiez), Andri Noa Sgier (Schluein Glion, amiez), Kelvin Shako (Schluein Glion, attaccader) e Samuel Zinsli (Schluein Glion, attaccader). L’equipa vegn trenada da Claudio Bundi e dil trenader da golis Damian Arpagaus.