Tarvaschegns da 
Ziràn-Reschen

(anr/bt) Tarvaschegns digl vaschinadi da Ziràn-Reschen da vendergis, igls 21 da zarcladur â gieu da tractar igl quent anual pigls 2018 a da dezider sch’igl vaschinadi vigli far part digl cudesch funsil da Tusàn. Igl quent anual pigls 2018 da Ziràn-Reschen seara cun antradas da 4 695 630 fràncs ad expensas da 4 236 580 fràncs. Quegl munta egn avanzamaint da 459 049 fràncs. Quel saresulta surtut da las ple òltas antradas digls tschains d’aua ca quegl c’igl eara previeu agl preventiv. Igl quent d’investiziùns seara cun expensas da 425 396 fràncs ca saresultan dad expensas totalas da 536 259 fràncs anviers antradas da 110 863 fràncs. Sen fundamaint digl raport da la cumissiùn da gestiùn â’l igl tarvaschegns prieu par bien tànt igl raport digl revisurat sco ear igl quent annual preschanto. La proposta da schliear igl zirquit digl cudesch funsil Ragn posteriur e vagnida apruvada tànt sco quella da far part digl zirquit digl cudesch funsil da Tusàn. Quella dezisiùn digl tarvaschegns cumprenda tànt la partizipaziùn tigl cudesch funsil da Tusàn sco ear la cumpra d’egna cumpart da la sozietad da proprietad da cundomini.