Sagonda meisa radonda tigl tema «ANiM sen tura»

(cop) Chesta seira s’inscuntra ainten la stalla dad ANiM en cres da persungas tgi s’angaschan, e chegl per piglier part alla sagonda meisa radonda tigl tema «ANiM sen tura – Segls fastezs digl sentimaint da pionier aint igl Parc Ela». Ena revista sen chegl tgi è gio capito. Igls amprems deis d’avregl da chesta premaveira èn Niki Wiese e Florian Wieser sa mess sen veia per amprender a canoscher pi bagn la Val Alvra. Chel de on igl suglegl, igl vent e la plievgia sa baratto giu adegna puspe. Exact madem èn er stos igl sentimaints digls tschertgafastezs: Ènigl sen la dretga veia? Az on els tschanto la dretga dumonda? È «igl far» ena clav tigl Parc Ela?

Oz, massa e-mails, ouras da discussiuns an divers lis, ainten la stalla dad ANiM u agl telefon, bleras belas fotografias e tocs da videos, tschagnas communablas ed ouras da té, bler reir, rachintar, filosofar, retschartger aint igl internet pi tard dattigl nign dubis ple: Igl sentimaint da pionier è zuppo ainten blers cors. Linda Netzer, la terza inizianta dad ANiM, resumescha: «Tar chels tgi on success cun lour projects ed igls projects èn ancunaschaints, tar chels ins s’accorscha igl puls. Oters spetgan anc segl stompel igl dretg mument u sen alliias. E tar prest tots è da s’accorscher la luschezza sen las ovras da pionier digls perdavants ed igl plascheir da tot chegl tgi ò anc da neir fatg.»

Ena massa bungas istorgias

Sen la pagina d’internet www.anim.jetzt/animsentura è da vaseir tgi exista gio ena glista cun ple tgi 100 noms ed istorgias. Istorgias tgi dattan perdetga digl «far» actual u istoric aint igl Parc Ela. Las istorgias vignan rimnadas ainten en archiv da project online e luvradas se las proximas emdas ed igls proxims meis. La rimnada duess inspirar, colliier e ranfurzar la colliaziun aint igl Parc Ela.

Discurs ve dalla meisa radonda

Igls 6 da zarcladour ò gia li aint igl Hotel Alvra a Casti l’amprema runda da persungas da Stierva, Mon e Salouf tgi s’angaschan. Gl’è nia discuto sur da muments da pionier, sentimaints da success, impedimaints, funtangas da forza. Dasperas las premissas spitgeidas per far ensatge – scu per exaimpel alliias, curasch, fidanza, abilitad da sa concentrar, viglia dad experimentar e tigneirtras – èn sa cristallisadas diversas ancunaschientschas:

– Schi vign fatg ensatge ègl betg schi impurtant tgi igl conturn catta chegl ena bung’ideia e schi ella geida ensatge alla cuminanza. Decisiv è tgi ins seia an accord cun la mutivaziun interna: Impurtant e dretg è chegl tgi ensatgi less propa-propa realisar scu giaveisch intern!

– Curasch sa mossa bler pir pi tard. Muments da curasch vignan descretgs uscheia, «ia va betg savia far oter», sainza tradeir sasez, igl compass intern.

– Per saveir tigneir or l’intschertezza tigls projects pogl gidar da pansar tras tot igls scenaris pussebels e dad aveir pront ena declaraziun percass tgi i vess betg da gartager. Chegl porta levezza e siertad.

– Er persungas angaschedas levan betg mintga de plagn curasch e forza da far ensatge. I fò bagn da discussiunar e da dar sustign l’egn a l’oter. Da saveir tgi dat segl manevel alliias, paraints d’art ni persungas cun mademas ideas, chegl dat forza.

Crear dasper cadagnas da creaziun da valour er cadagnas da stema

An tot èn planisos quatter inscunters ve dalla meisa radonda tgi èn dasper las visetas a tgesa ed igls contacts directs ena veia per rimnar istorgias e sa barattar or tranter persungas angaschedas. An amprema lengia geidan ellas pero dad etableir ena «cultura da stema». ANiM focussescha cugl cuntign e metodicamaintg aposta sen lavour da stema. Igls miglers craps da construcziun per en preschaint e futur tgi gartegia, tgi funcziunescha betg angal ple tenor prancepis economics, èn factours scu da stimar l’atgna lavour e la lavour digl proxim.

Las proximas staziuns

Igl proxim inscunter ve dalla meisa radonda ò li oz, igls 27 da zarcladour ainten la stalla dad ANiM a Savognin. Ena annunztga spontana è pussebla anc anfignen allas 14.00. Siva las vacanzas da stad cuntinuescha igl viadi a Beiva (22 d’avost) e Barvogn (3 d’otgover). Las occurenzas on li adegna la seira dallas 20.00 anfignen allas 22.30.

Chel tgi less gugent piglier part, chel tgi catta betg anc igl sies nom sen la glista ni chel tgi canoscha anc oters projects da pionier so s’annunztgier tar ANiM u er nominar persungas. ANiM e sies partenari da cooperaziun, l’Uniun Parc Ela, sa legran dad amprender a canoscher blers scazis anc zuppos.