«Nous tignagn ansemen la Svizra»

(cp) Avant curt ò gia li a Casti la radunanza generala dalla pcd Alvra/Surses. Chella è stada an cler segn dallas elecziuns. L’antiera suprastanza è neida reeligeida; Michaela Pegorari succeda a Katharina Ulber. Las elecziuns naziunalas èn stadas igl punct central digl referat da Gianna Luzio, la secretaria generala dalla pcd svizra. Tar la radunanza generala èn las elecziuns stadas aint igl center: L’actuara Katharina Ulber da Planeiras ò gia demissiuno. La vicepresidenta dalla Dertgira regiunala Alvra ò s’angaschea fitg igls davos otg onns per la parteida regiunala. Igl president e deputo Romano Paterlini ò angraztgea ad Ulber per la bunga lavour e la confidanza. Scu successoura da Ulber è neida eligeida Michaela Pegorari dad Alvagni. Paterlini ò gia grond plascheir da beneventar e preschentar Pegorari, cunchegl tgi la suprastanza vigna regiuvinada antras l’elecziun dalla secretaria d’advocat da 32 onns. Chegl corresponda ad ena fegnameira dalla parteida: «Cun la nossa politica lainsa contanscher adegna daple giovens tgi s’angaschan ainten la politica, tgi vottan muantar ensatge e tgi vottan purtar anavant la nossa regiun cun ena politica genuina ed orientada a schliaziuns», uscheia Paterlini. Reeligias èn er nias igls ulteriours commembers da suprastanza, numnadamaintg Romano Paterlini da Planeiras scu president, Patric Vincenz da Savognin scu vicepresident, Elisabeth Sigron-Cantieni da Lain scu cassiera e Reto Crameri da Surava scu responsabel per las medias. Igls ulteriours affaris statuars èn stos sarros giu spertamaintg. Tranter oter è igl reglamaint da finanzas nia revidia, uscheia tgi deputos dalla pcd Alvra/Surses paian da nov 200 francs anstagl scu anfignen ossa 100 francs scu contribuziun da mandat e suppleants da nov 100 francs. Las contribuziuns digls commembers vignan laschedas tar 40 francs per commembers singuls e 60 francs per pêrs. Plagn plascheir ò Paterlini dastgea communitgier tgi la pi gronda parteida regiunala digl Grischun central vegia gudagnea gl’onn passo novs commembers.

Referat impressiunont

Gianna Luzio, secretaria generala dalla pcd svizra, ò alloura tignia en referat impressiunont sur dalla sia lavour. Cò è Paterlini losch dad aveir cun cunsiglier digls stands Stefan Engler ena forza cumprovada e tgi la parteida regiunala ò cun Luzio er ena candidata per las elecziuns digl cunsegl naziunal. Luzio ò laschea nign dubi tgi ella seia pronta per eir aint igl cunsegl naziunal. Ampremas experientschas politicas ò la donna da Savognin tgi ò stibgia geografia ed economia publica rimno ainten la regiun. Ella ò collaboro tigl Festival Cultural Origen. Igl amprem scu actoura e siva ainten suprastanza, chegl tgi ò fatg grond plascheir ad ella. Dodesch onns è GLuzio stada ainten la suprastanza digl Parc Ela, er scu vice-presidenta. «Ia va adegna m’angaschea gugent e cun plascheir per la nossa belezza regiun unica tgi monta per mè patria.» Ansemen cun la pcd giovna digl Grischun ò ella rimno dalla festa d’avertura digl Parc Ela sottascripziuns pigl fond d’innovaziun – l’amprema iniziativa cantunala d’ena parteida giovna tgi ò gia success. Igl 2006 è ella alloura neida eligeida scu suppleanta pigl circuit da Surses. Siva digl studi è ella s’orientada an direcziun Berna noua tgi ella ò luvro tranter oter per sarvetschs parlamentarics e la Seco. Tar cunsiglier federal Alain Berset è ella stada tschintg onns referenta aint igl sectour finanzas, sanadad ed economia. Antras en antop casual cugl cunsiglier naziunal Martin Candinas seia ella neida tigl post dalla secretaria generala. Ansasez vess ella lia s’orientar an direcziun Grischun.

Noua stat la parteida?

Igls commembers dalla pcd Alvra/Surses on lia saveir digl mang dretg digl president Gerhard Pfister scu tgi geia cun la parteida igl onn dallas elecziuns. Luzio è persvadeida tgi la pcd seia posiziunada bagn. Vurdo sur l’antiera Svizra vegia la pcd ena quota d’electours dad 11,6%. La parteida vegia scu parteida da mez – cun excepziun digl onn 2007 cugl «effect da Leuthard» – pers igls davos onns adegna daple quotas d’electours. Aint igl cunsegl digls stands seia la parteida da mez pero anc adegna la pi ferma forza. Vurdo sur l’antiera Svizra metta la pcd, cun 500 candidats a disposiziun, tants scu anc mai. Luzio metta gronda peisa sen chegl tgi i seia er ena gronda part candidatas: «Daple tgi 40% digls candidats èn donnas. Blers digls candidats èn er persungas giovnas, angaschedas, tgi on anc avant els lour futur politic», uscheia Luzio. Igl slogan dallas elecziuns «Nous tignagn ansemen la Svizra» ò oramaias musso effect: Luzio ò fatg attent tgi ainten la davosa legislatura vegia surtot igl bloccar dalla pps e dalla pld betg lubia schliaziuns. «La davosa legislatura è stada marcada da fermadas.» Schi i seia do schliaziuns, alloura angal graztga alla forza da communitgier dalla pcd. Ella ò fatg attent sen la refurma dalla AVS e dalla taglia tgi è neida sustigneida dalla pcd e tgi ò gia grond success dallas davosas votaziuns. «Perchegl è la pcd svizra persvadeida tgi la Svizra dovra en ferm center politic tgi elaborescha schliaziuns e porta anavant la nossa tera», uscheia Luzio. Tge parteidas tgi vignan a gudagner igl aton vign a sa mussar igls 20 d’otgover: Alloura on li las elecziuns pigl cunsegl naziunal e pigl cunsegl digls stands.