Terminau cun in gi da fiasta

dad Andreas Cadonau / ANR

Il vendergis vargau ei staus in punct culminont dalla formaziun per las absolventas ed ils absolvents dalla Scola media e professiunala commerciala e per tals dalla Scola professiunala industriala a Glion. Els han retschiert ils diploms ed ein vegni relaschai ella veta professiunala ni scolaziun supplementara. Quei vala medemamein per las scolaras ed ils scolars dalla Scola vinavon.

La surdada da diploms e la finiziun dallas scolaziuns valan sco gi da fiasta per absolventas ed absolvents ed els retscheivan igl applaus meritau per las stentas vargadas. Enramai vegnan ils acts festivs dad explicaziuns beinvulentas, buns cussegls e tuns musicals. Alla fiasta da finiziun dalla Scola vinavon ha la gruppa da cant tgamunada dad Albert Spescha procurau per la rama musicala. E per la medema tempra ei il duo Jenia cun Svenia Tomaschett e Jasmin Bearth staus responsabels alla fiasta da diplom dalla Scola media e professiunala commerciala e dalla Scola professiunala industriala. Tuttas treis instituziuns han envidau alla fiasta da diplom e finiziun il vendergis vargau a Glion.

pagina 5