Sensaziun a Scuol: Chastagnin/bulieu tschep sin 2440 meters

L’ETH Turitg ha chattà durant lavurs da perscrutaziun or en il liber ils pli auts chastagnins en las Alps, da quai ch’ins sa enfin uss. Quai rapporta l’agentura da novitads SDA tenor ina communicaziun da l’ETH. Els han fatg gronds egls, las studentas ed ils students da la Scola politecnica federala ETH a Turitg: Cun far lavurs da perscrutaziun han els chattà sur Scuol sin la Motta Naluns chastagnins – e quai sin 2440 meters sur mar. Enfin uss n’èri betg enconuschent ch’il chastagnin creschia en las Alps sin ina tal’autezza. Enfin uss han ins chattà els en il Tessin u en l’Austria sin 2200 meters sur mar. Ils pli auts èn dentant ils chastagnins americans: En ils Rocky Mountains creschan els perfin sin 3500 meters sur mar. Per ils perscrutaders da l’ETH n’è quai dentant betg l’unica sensaziun. Il chastagnin da la Motta Naluns ha er anc in partenari insolit. Cun quai ch’i na dettia strusch auters partenaris en quell’autezza saja il chastagnin sa decidì dad ir en ina simbiosa tut speziala – e da crescher gist sper ina chaglia bassa Salix herbacea. Co ch’ils chastagnins sajan arrivads sin quest’autezza n’han ils perscrutaders anc betg savì respunder. I savess esser ch’els èn arrivads cun il vent u er ch’els èn restanzas da pli baud nua ch’il cunfin da la bostga er anc bler pli aut ch’uss. Tgunsch pussaivel èsi er che la midada dal clima gioga ina rolla, scriva la ETH.