Dapli meds d’instrucziun rumantschs

da Martin Cabalzar

La Magistraglia grischuna, l’uniun tetgala da las magistras e dals magisters dal Grischun, pretenda dapli meds d’instrucziun en rumantsch e talian sco er in stgomi da classas tranter las regiuns linguisticas. Sco quai che la mainagestiun da la Magistraglia grischuna Sandra Locher Benguerel accentuescha vers La Quotidiana pretenda la MAGR da transponer il meds da promoziun linguistica da la confederaziun sin il sectur da scolaziun e furmaziun. Per urgenta taxescha Locher Benguerel la translaziun dals meds d’instrucziun en rumantsch ed en talian en qualitad equivalenta al tudestg. En las linguas minoritaras dettia actualmain strusch meds d’instrucziun moderns e cumpatibels cun il Plan d’instrucziun 21. La Magistraglia grischuna sustegn principalmain er il stgomi da classas tranter las regiuns linguisticas sco el vegn era postulà en il messadi da cultura da la confederaziun per ils onns 2021–2024. Tenor tut ils interrogads èn mesiras en il sectur da la furmaziun «absolutamain centralas» per la promoziun da la lingua. Quai valia tant pli per il rumantsch che na saja betg mo periclità, mabain smanatschà en sia existenza. La mancanza da meds d’instrucziun attractivs en rumantsch e talian sforzian magistras e magisters rumantschs da far lavur supplementara cun translatar ed adattar sezs ils meds d’instrucziun. Savens vegnia dentant simplamain utilisà ils meds tudestgs ch’èn a disposiziun. La MAGR pretenda perquai in tractament da tut las trais linguas uffizialas dal Grischun.

commentari e pagina 2