Va ei aunc pli arrogant e paradox?

Igl ei a mi absolutamein clar che la suprastonza communala sto adattar tenor lescha federala la planisaziun locala ed ei aschia sfurzada da prender numerusas parcellas puspei ord zona da baghegiar.Tenor las informaziuns dadas tochen uss vegn quei ad esser varga 10 hectaras, ni 100 000 m2. Prendan ins in intragliauter da mo 100 francs per m2 fa quei tut ensemen ina svaletaziun als possessurs lumnezians da 10 milliuns francs. Probabel lai quei buc evitar. Denton lu eis ei fetg paradox, gie bunamein arrogant da publicar el medem fegl ufficial ina damonda da baghegiar ina casa ordeifer la zona en la zona d’agricultura (tgi emporta nuot, igl ei miu principi). Aschia capeschel jeu tuts che gin ch’ils purs sappien far dapertut tgei ch’ei veglien. Che quei ei denton buc aschia, gest quei ch’appartegn baghegiar ord zona, muossan las davosas decisiuns dalla Dertgira federala.

Cun quellas davosas decisiuns sa la vischnaunca maneivel decider auter, senza tedlar sil pareri total dasperas dil cantun.

Perquei fa ei schon surstar ch’aschia ina damonda che cunterfa total alla planisazun locala da nossa vischnaunca vegn insumma scretta ora. Da gir eis ei denton che quella cunterfa silmeins buc al dretg public, auter ch’il problem dallas vias da meglieraziun nua che la medema suprastonza scriva mintg’onn il november ch’ellas astgien buca vegnir rumidas dalla neiv damai ch’ellas mondien lu en decadenza pli spert (buca «frostsicher»). Ils cuosts persuenter pagan per sesez ils pagataglias dalla Lumnezia. Aschia era a Lumbrein per la via ch’era en sesez decidida dalla radunonza communala, lu aunc Lumbrein, sco via da scursalar entochen all’entschatta dil vitg. Tgei ch’ei vegniu ordlunder cun la fusiun dumandei suenter las vischinas ed ils vischins sco era ils jasters cun casas da vacanzas a Lumbrein, ed ei vegn aunc mender sche tuts dierman vinavon e laian trafficar la suprastonaza aschia sco descret sura. Miu meini en quella materia sa la suprastonza denton gia daditg. Jeu scrivel quei perquei ch’jeu sun mez buca pertuccaus cun la rezonaziun e perquei ch’jeu hai enteifer in onn mussau si en plirs cass el Grischun ed era en Lumnezia ch’ei va era auter.Bistgaun Capaul, Lumbrein