34avla fiasta dils pescadurs

(anr/abc) L’Uniun da pescadurs Castrisch ha puspei preparau sia fiasta da pescadurs. Igl ei ina dallas sentupadas popularas dalla stad ella Foppa. L’occurrenza attrai mintg’onn massa glieud giu l’Isla Sut spel Rein. Sonda proxima, ils 13 da fenadur astg’ins guder entginas uras da cumpignia en in ambient singular. El center ei la tscheina da pèschs cun litgivas dil gril. Era pèschs filetai pigliai aposta per quella fiasta offerescha l’uniun. Il transport naven dalla staziun da Castrisch ei organisaus cun in bus pendular, quel meina ils visitaders direct sil plaz avon la tenda. Ins ha caschun da guder ils deletgs culinarics dalla cuschina dils pescadurs e la hospitalitad dils da Castrisch. Per visitaders ch’han buca bugen pèschs dat ei naturalmein las caussas usitadas dil gril. Tenor las previsiuns dall’aura per la fin d’jamna ston ils visitaders quintar cun in ni l’auter uradi, quei che vegn ualvess a lavagar la fiasta ella tenda dils pescadurs a Castrisch. Ils hosps vegnan ad esser sut tetg e schurmegiai d’in’eventuala plievgia tievgia da stad. Naven dallas 18.00 beneventa l’uniun pign e grond. Per variaziun e per tuchegiar dat ei pli tard musica da sault ed ils organisaturs porschan puspei igl attractiv giug da minibenissimo. Suenter la notg hilarica cuntinuescha la fiasta la dumengia endamaun cul survetsch divin da pescadurs allas 11.00.

L’uniun envida la glieud da lunsch e da maneivel a quella 34avla fiasta a Castrisch.