Exposituors cuntaints e fatschas riantadas

DA BENEDICT STECHER / ANR

Sonda passada s’han chattats a S-charl ils amatuors dal marchà artischan cun prodots indigens. Ils organisatuors han pisserà eir per l’ustaria da festa cun trategnimaint musical. S-charl as rechatta 13 kilometers davent da Scuol vers mezdi. Là ingio chi gnivan explotats minerals per guadagnar landroura plom ed argient ha gnü lö sonda passada il marchà da S-charl. S-charl es avert impustüt la stà e vala sco ün dals lös preferits da giasts chi fan vacanzas in Engiadina Bassa. Il museum a l’entrada da S-charl es gnü fabrichà süls mürs vegls da las ruinas da la Schmelzra e muossa impreschiunantamaing co cha’ls miniers lavuraivan aint ils cuvels dal Mot Madlain e pro la Schmelzra. Sül plan suot tet dal museum as rechatta ün’exposiziun dals uors organisada dal Parc Naziunal Svizzer. L’on passà han ils miniers da S-charl festagià il giubileum da 700 ons minieras da S-charl cun üna festa da cumplion.

Il marchà rimplazza 
la festa da S-charl

Sco cha Chantal Mayor ha declerà s’esa gnü sün l’idea d’organisar ün marchà tras cumün pervi cha la festa da S-charl nu gniva plü fatta: «No vain decis da provar da realisar üna jada il marchà e da verer co cha quel vain acceptà da la glieud. Cun quai cha quel ha gnü grond success vaina lura decis da cuntinuar.» Per la terza jada ha gnü lö perquai il marchà da S-charl immez il pitschen cumünet cun prodots da paurs, da la mansteranza e dad ogets pel minchadi. Sper ils stands cun prodots multifaris d’eira eir organisà üna restoraziun da festa cun mangiar e baiver chi ha pisserà pel bainstar dals visitaduors. «No eschan üna gruppa chi organisescha l’evenimaint e pel marchà svess vaina avuonda agüdants chi collavureschan. Quist on vaina 24 stands cun prodots da tuot gener», ha dit Mayor. Eir Ramon Cantieni es ün dals organisatuors chi ha svessa ün stand al marchà da S-charl: «Avant trais ons vaina cumanzà e vain gnü success in möd cha no sperain cha’l marchà vain organisà eir inavant. Il success dal marchà dependa adüna eir da l’ora e fin uossa vaina gnü tant inavant furtüna», ha’l dit. Eir ils uffants nu sun gnüts a la cuorta. Els han pudü as tratgnair i’l chastè per siglir ed han eir gnü la pussibiltà d’ir a sella .

Persuna da contact 
d’eira Chantal Mayor

L’idea d’organisar marchats in S-charl han gnü al principi Chantal Mayor cun seis bap Dominique Mayor ed insembel cul musicist Roland Vögtli e Ramon Cantieni. Els han organisà dal 2017 per la prüma jada il marchà da S-charl culla spranza cha quel gnia manà inavant. Intant ha gnü lö la terza ediziun ed ils respunsabels speran chi pudess dar cul temp ün marchà da tradiziun. Il marchà nun es pensà per far gronds affars, dimpersè per preschantar las sportas cun prodots da la regiun per giasts ed indigens. Il marchà d’eira organisà davent da la baselgina al principi da la fracziun fin pro’l restorant Crusch Alba a dretta ed a schnestra da la via. Al marchà d’eira eir pisserà per trategnimaint musical cun Peder e Benedict e cun Aurikla chi han procurà per buna glüna.