Fiasta solemna a Vrin

Dad Augustin Beeli / ANR

Entadem la Lumnezia ei la populaziun separticipada dumengia vargada alla fiasta dil s. Scapulier ni cuolm Carmel. Igl ei la perdanonza da Vrin. Dapi cu ins fa a Vrin perdanonza entuorn ils 16 da fenadur ei buc enconuschent. Forsa ei la perdanonza dil fenadur cumbinada indirect cullas lavurs stagiunalas dil puresser. La dumengia dil s. Scapulier ni dil cuolm Carmel ei perinagada cumbinada culla veneraziun da Nossadunna e culla confraternitad dils Carmelitans, in uorden ch’ei staus fetg populars ell’Europa. Probabel han ins introduciu a Vrin la fiasta culla consecraziun dalla baselgia renovada, quei ei schabegiau igl onn 1694. Dumengia vargada ha la populaziun da Vrin festivau solemnamein sia perdanonza. Sur Dirk Jasinski ha celebrau il survetsch divin, il Chor mischedau Vrin/Surin ha cantau. Sco mintg’onn haveva la giuventetgna fatg tschupials. La cumpignia da mats ha fatg parada e las giuvnas els costums tradiziunals dalla confraternitad han purtau Nossadunna. Suenter las funcziuns en baselgia ha la Societad da musica Greina Vrin delectau la raspada cun in concert. Leu ha la cumpignia da mats era dau las salvias pils dignitaris.

pagina 5