Informaziun e divertiment

(anr/hh) L’excursiun dallas emprendistas e dils emprendists dalla Distec SA a Mustér ha saviu vegnir organisada da bialaura en cumbinaziun cun informaziuns, tensiun e divertiment. Ils puncts culminonts ein stai ina viseta el tunnel da basa dil Gottard e divertiment cun go-kart. «Fetg interessanta ei l’investa dil tunnel da basa dil Gottard al portal dil sid a Pollegio/Blizuna stada», scrivan ils responsabels en ina communicaziun als mieds da massa. Leu han las emprendistas ed ils emprendists survegniu in tschuppel informaziuns ed han cheutras saviu emprender bia. En quei connex ei era la cumponenta tecnica per las vegnentas polimecanistas ed ils vegnents polimecanists buca vegnida alla cuorta. Aschia han els saviu prender investa d’in vehichel d’engaschament ed in tren da stizzar fiug ch’ha custau buca meins che 16 milliuns francs. Cheutras han els saviu far inaga experientscha cun in auter sectur tecnic. Suenter quell’orientaziun ei vegniu cuntinuau cul viadi a Locarno-Magadino. Sigl iral da go-kart han ils giuvenils saviu sedivertir. Suenter treis cuorsas ein ils campiuns stai erui ed ein vegni honorai. Mo era il divertiment culinari ha buca muncau quei di. Aschia ein las emprendistas ed ils emprendists returnai plein forza e cun bialas impressiuns e regurdientschas anavos a Mustér.