Soglio è nominà per il Prix Montagne 2019

(mc) Era quest onn surdattan l’Associaziun svizra per las regiuns da muntogna (SAB) e l’Agid da muntogna il Prix Montagne 2019 ch’è dotà cun 40 000 francs. Tranter ils sis nominads sa chatta er il vitg grischun da Soglio en Bregaglia cun ses products natirals da cosmetica. Il Prix Montagne vegn surdà mintg’onn dapi 2011. Dapi lura èn dus projects grischuns vegnids distinguids: La cooperativa da producents da Gran Alpin (2011) e La Conditoria da Reto Schmid, Sedrun (2018).

Ina gronda varietad da projects

Ina giuria sut l’egida da Bernhard Russi ha fatg era quest onn ina preselecziun dals 56 projects inoltrads ed ha la finala nominà sis projects che contribueschan a moda exemplarica al svilup dals posts da lavur ed a la diversificaziun economica en las regiuns muntagnardas. Tranter ils sis nominads vegn surdà supplementarmain in premi dal publicum dotà cun 20 000 francs sponsurà da l’assicuranza Mobiliar. La votaziun online per il premi dal publicum cuzza fin ils 22 d’avust. La paletta dals projects inoltrads tanscha d’in manaschi d’agroturissem cun chasa da giasts, in purschider d’internet per regiuns allontanadas, ina bieraria, ina chascharia ed in producent da pastuiras al pe per la surveglianza electronica.

Products da Soglio

Dals aspirants per la preselecziun or dal Grischun èn ils «products da Soglio» ids cun la plima. Sin las spundas stippas dal vitg bregagliot creschan las essenzas che vegnan elavuradas per ils products da cosmetica e per la tgira dal corp da la cooperativa dals products da Soglio. Quai n’è betg sa midà en il decurs dals 40 onns existenza dal piunier da products cosmetics natirals.

Insumma para la natira bunamain virginala e genuina da la Val Bregaglia d’esser ina funtauna d’inspiraziun per umans cun grondas ideas. Da questa vallada alpina averta vers il sid derivan numnadamain ils artists sco Giacometti e Segantini. Dentant era Walter Hunkeler, oriund da Basilea, e stà fascinà da la varietad natirala da la cuntrada ed ha prendì domicil a Soglio. Sco laborant da biologia enconuscheva el la valur e l’effect curativ d’ervas selvadias, da paintg da chaura e da scharun nursa ed el ha cumenzà ad empruvar d’elavurar e nobilisar quests product natirals. En sia chasa da crap ha el installà in pitschen labor ed ensemen cun sia dunna ha el sviluppà in etg per tractar e medegar mals da las musclas e da las giugadiras. Ordlonder è sa resultà il product «Soliosan» che consista d’ielis viscus da paintg chaura. Curt suenter han els obtegnì support professiunal da l’econom da manaschi Martin Ermatinger ch’ha sviluppà il marketing das products da Soglio. Oz furnischan ils purs d’ervas da Soglio lur erva setgentada directamain en il center da producziun a Castasegna. Il nov lieu da producziun porscha spazi sufficient per la producziun e spediziun dals actualmain passa 50 differents products da cosmetica e tgira dal corp. Quels vegnan registrads sin agen shop d’online u vendids ad indigens ed esters en l’atgna stizun a Soglio ed en differentas stizuns e drogarias da la regiun. En Svizra vegnan ils producs da Soglio vendits en tuttas stizuns da Claro.

Retgav da valur sco remiedi 
cunter la depopulaziun

La gronda part da noss 20 collavuraturas e collavuraturs vivan en Bregaglia. «Els èn loschs da pudair producir in product d’auta qualitad che represchenta lur patria», tradescha il mainagestiun Phillippe Auderset vers La Quotidiana.Tenor ses avis na profitescha betg mo l’interpresa sezza da la reputaziun dals products, mabain er il turissem. Ivo Ermatinger (28) è sco figl dal confundatur Martin Ermatinger creschì viaden successivamain en l’interpresa. Sia carriera professiunala è sumeglianta a quella da blers giuvens bregagliots. Per mancanza d’autras pussaivladads ha era el stuì bandunar la Val nativa per far sia scolaziun en la Bassa. Suenter avair terminà il studi d’economia ha el nizzegià la schanza da returnar en sia Val nativa e d’entrar en l’interpresa cun l’opziun da pudair surpigliar pli tard la direcziun. Sco el s’exprima vers La Quotidiana èsi sia visiun da sviluppar vinavant ils products da Soglio e da rinforzar la rait da producents entaifer la vallada. Uschia duain er anc ulteriurs giuvens e giuvnas da la Val avair la schanza da pudair returnar en lur patria nativa ed avair là in’existenza», accentuescha Ermatinger.