Deletg dallas muntognas – regiunalitad vivida

Da Hans Huonder / anr

Il mardis ei la partenza dil viadi dils berniers cun cavals e méls dil Grischun en direcziun Fête des Vignerons succedida a Mustér. Igl ei ina da pliras acziuns arranschadas da «graubündenVIVA» el rom dalla Fiasta dils senns. Quella ha entschiet la primavera e cuoza entochen l’auter onn. Suenter las preparativas ch’han cuzzau plirs onns e la planisaziun sur plirs meins ha «graubündenVIVA» festivau l’entschatta matg la partenza da siu program. La finamira ei da propagar e promover las atgnadads regiunalas dil Grischun, seigi ella producziun, el perfecziunament da products, la gastronomia ed igl artisanadi. Quei duei succeder cun arranschaments ton el Grischun sco ordeifer. Parallelmein sper las occurrenzas ni il sustegn d’eveniments gia existents edescha «graubündenVIVA» era quater magazins. Igl emprem ei cumparius la primavera ed en quel stat la regiunalitad dil cantun Grischun el center. En quel vegn portretau persunas che s’engaschan en favur da products e che raquentan historias. L’emprem’ediziun ei sefatschentada en emprema lingia da tematicas dalla Valrein grischuna. Quei magazin ei vegnius derasaus ensemen cun las gasettas dil di grischunas. Purtadra da «graubündenVIVA» ei in’uniun che porta il medem num e ch’ei vegnida fundada igl uost 2016. Ella vegn presidiada dil historicher e president dalla Fundaziun claustra s. Gion a Müstair, Walter Anderau. Commembras e commembers dall’uniun ein representants ni organisaziuns dall’agricultura, gastronomia e hotellaria, sco era dall’economia, transport e cultura dil Grischun.

Buca mo vivonda

El center dil program da «graubündenVIVA» stattan las producentas ed ils producents egl entir cantun Grischun e che lavuran tenor directivas controlladas. Biars da quels products regiunals ein innovativs e procuran aschia per ina plivalur locala ni regiunala. La paletta che «graubündenVIVA» propaghescha e promova seconcentrescha denton buca mo sin vivonda. Era dessegn ed artisanadi cattan plaz el project. En collaboraziun cun GrischunLenn ed il studio per dessegn ed artisanadi Okro ei vegniu scaffiu lavurs ord pégn ed ischi che vegnan en funcziun allas differentas occurrenzas da «graubündenVIVA». Aschia per exempel ils 50 stans ni era meisas e bauns per las fieras. La finamira ei da propagar ad arranschaments enteifer sco era ordeifer il cantun il meglier ch’il Grischun ha da porscher e quei sur bunamein dus onns. «graubündenVIVA – deletg ord ils cuolms» ei in program singular en Svizra e duei gidar a rinforzar il Grischun sco liug da producziun, per exempel per vivonda e culinari. Cun quei program seposiziunescha il cantun Grischun sco emprema regiun dallas Alps consequentamein cun ses cuntegns. Il program ei pusseivels mo grazia al sustegn da differents partenaris ord pliras branschas. Denter quels s’audan Coop, la Viafier retica, GrischunLenn, Alpinavera, GrischunVin, Gastro Grischun, Somedia ni era numerus producents, interpresas e persunas singulas.

Era en Surselva

In dils puncts culminonts digl emprem onn da «graubündenVIVA» ei il viadi dil Grischun alla Fête des Vignerons a Vevey. Quei viadi dils berniers cun cavals e méls sur sis etappas a pei entochen a Brig e silsuenter cun vehichels entochen el cantun Vad ha entschiet il mardis a Mustér. Uonn han denton aunc dus ulteriurs arranschaments liug en Surselva promovi da «graubündenVIVA». Aschia sustegn l’organisaziun la fiera dil caschiel d’alp dalla Surselva ils 31 d’uost 2019 a Glion. Sper la degustaziun e vendita da caschiel d’alp vegn arranschau quei di ina fiera cun auters products regiunals. In ulteriur eveniment sustenius da «graubündenVIVA» ei in’excursiun cun Emanuel Berni. «Alpine Inspiration» ei ina cuschina da caracter autentic regiunal ch’ha la finamira da nezegiar igl aroma ord la natira per creaziuns specialas. Berni tscherca sez ses products ella natira. Igl arranschament cumpeglia ina viseta dil vitg da Val S. Pieder sco era dil curtgin d’jarvas e verduras d’Emanuel Berni. El restaurant da muntogna Gadastatt vegn allura cuschinau denter auter cun coclas anfladas ella natira.

Ulteriuras informaziuns:

www.graubündenviva.ch