Sil balcun verd

Dad Augustin Beeli / ANR

Daco ir lunsch sch’ei dat datier era bials cuolms e pezza? Per exempel la Pala da Tgiern sur Camuns. Igl ei ina scuvretga exaltonta. Arrivai sisum han biars il basegns da s’exprimer. Aschia cuntegn il cudisch da visetas dalla Pala da Tgiern superlativs sco «bellezia», «fetg imposant», «grondius», «magnific». Malgrad ch’igl ei in crest verd ei il panorama impressiunonts. Sil balcun dalla Lumnezia sut eis ei spazius, ins sa ruassar e mirar sur la cuntrada: Sin cuolms e vals, bleissas interruttas da vallatschas, sils vitgs dalla Lumnezia, viers nord sin Glion, sur la cadeina dil Mundaun sepresentan ils Cavistrai ed il Péz Durschin. La Pala da Tgiern ei in péz sin 2279 m s.m. Da principi eis ei in cuolm. Pils 18 000 visitaders digl Open Air Lumnezia eis ei il punct geografic il pli marcant mirond en direcziun sidost. Interessantamein dat ei ella Lumbardia in ulteriur cuolm cun quei num. Il Pizzo Badile Camuno ei in’interessanta constellaziun: Cheu la marcanta Pala da Tgiern da Camuns, leugiu ellas Alps bergamascas il Pizzo Badile Camuno.

pagina 3