Dapli gudogn – ma betg dapli daners en cassa

Gudogns en fila han communi-tgà las vischnancas grischunas questa primavaira e stad. Per part pervi da HRM 2, il nov sistem da contabilitad, che na lubescha betg pli uschè grondas amortisaziuns. Cifras cotschnas eran avant paucs onns anc normalitad en ils quints annuals da las vischnancas grischunas. Uss mussan ellas per part ora bels gudogns. Tut tenor tge vischnanca ch’ins dumonda, vegnan inditgadas autras raschuns per ils gudogns. Per exempel: dapli entradas da taglia, restituziuns da l’auto da posta ch’aveva incassà memia bler subvenziuns, HRM 2, il nov sistem da contabilitad.

Quellas vischnancas che indi-tgeschan HRM 2, mussan ora dapli gudogns pervi da las amortisaziuns. Il vegl sistem da contabilitad prevediva amortisaziuns degressivas, il nov sistem lubescha mo pli amortisaziuns linearas, pia gulivas.

Nagut cun gudogns. Spargnaders tar l’UBS cun contos ch’han si dapli che dus milliuns francs, ston a partir dal november da quest onn pajar 0,75% tschains negativs. L’argumentaziun: La fasa da tschains bass vegnia a cuntinuar, uschia che las bancas stoppian pajar vinavant tschains negativs a las bancas naziunalas. Quai che n’è dentant betg planisà, saja dad engrevgiar spargnaders pitschens cun tschains negativs. La UBS n’è betg la prima banca che dat vinavant ils tschains negativs. Era la banca Julius Bär metta a quint a tscherts clients tschains negativs, tar els vala dentant in import liber da 500 00 francs. Enconuschentamain dat era la Banca Chantunala Grischuna vinavant ils tschains negativs a tscherts clients. Da metter a quint tschains negativs, la quala la Banca naziunala svizra ha introducì avant quatter onns e mez, è in tema en l’entira branscha.