Maila cotschna (5)

raquint cuntinuà 
da Viola Cadruvi

Sur la fatscha da ses vischin sa filan nattas. Nattas finas precisas, sco tratg cun la maschina da cuser cun fil rosa cler. Ella n‘è uschiglio nagina che guarda pitgiv, insumma betg. Ma ella na po betg sa schliar. Las nattas finas. E lura savura el dad opium 1977. Il parfum da sia tatta. Puspè ils maletgs e las regurdientschas en ses chau. Ella stauscha davent ils patratgs. Tgi è quest tip?

E lura turna el il chau. Sin la vart sanestra da sia fatscha cuntinueschan las nattas. Ussa ch’ella vesa l’entira fatscha craja ella da vesair in muster. Ina staila engravada en sia fatscha, sur la gauta vi va in pez engiu, in ensi sur l’ureglia, in sur il frunt, lura cuntinuescha il muster da tschella vart da la fatscha e finescha en in piz sin il mintun.

Spert guarda ella puspè sin il laptop davant ella. Il tren rampluna sur ils binaris cura ch’il maun da ses vischin cumpara puspè en sia vista. El mussa sin ses monitur. Gnervus prenda ella giu ses ure-gliers, plain sgarschur ch’il um vuless far ina scena perquai ch’ella ha guardà talmain sin sias nattas. Betg ch’ella na fiss en general betg per ina buna dispita publica, questa odur. E las nattas. «S’interesseschas per chauns?» dumonda el. Ella na sa betg sch’ella duess esser levgiada u enervada. Smalltalk. La chaussa pli nunnecessaria e pli stentusa, anc avant la funcziun da telefonar dal smartphone. Tgi dovra da quellas chaussas? Ma bun, ella ha ina nauscha conscienza perquai ch’ella ha guardà sin sias nattas e respunda pia: «Na, jau fatsch la website per in allevatur.» «Momo», respunda el. Momo. Sco sia tatta. Pir ussa percorscha ella ch’el discurra rumantsch cun ella. «Ès ti dal Grischun?» dumonda ella e sa turpegia el medem mument per la tuppa dumonda. Danunder duess el uschiglio esser? El surri. El para da pensar il medem, ma respunda lura: «Na, mo mes geniturs.» Aha. Ella dat dal chau. Il curt discurs para dad esser a fin, ella less schon esser levgiada cura ch’il um sa drizza puspè ad ella: «Pudessas era far ina tala website per mai?»

Ella less schon revolver ils egls, ma sa retegn gist anc. Ella enconuscha tals tips. Han il sentiment ch’ella possia far in pau lavur gratuita per els, bun martgà, perquai ch’ella para talmain giuvna u simpatica u perquai ch’ins as ha entupà sin talmain casuala moda. Empè d’ina resposta fitg maltschecca sa decida ella dentant per ina resposta mez-maltschecca: «Quai custa aber.» «Daners n’èn nagin problem.» Ussa revolva ella propi ils egls. Tals blaguns ha ella fitg gugent. Ella sa volva puspè envers ses laptop. «Na propi», agiunta el. «Lura va toch tar ina fa-tschenta», di ella e vul puspè tschentar si ils uregliers. «Gliez na va betg», respunda el cun in surrir. «E pertge betg?» «Perquai ch’il cuntegn da questa pagina vegn probabel ad esser in pau delicat.»

Scrit sin mes telefonin/cuntinuaziun suonda