Midada Artantic

(cp) Avon dus onns ha Paul Nay aviert ina stizun dad antiquitads ed art a Glion.

Suenter quella experientscha ha el vuliu midar strategia da vendita. Ozildi che tonta vendita sespleiga sur internet ei era Nay sedecidius da far ina midada en quella direcziun. En quei connex ha el era fatg ina midada da domicil. Da niev secatta quel en ina localitad dalla anteriura fabrica da ponn, ella Via Fabrica 15 a Trun. Sin in spazi pli grond e pli surveseivel expona el leu sias raritads.

Tgi che catta sin sia pagina d’internet ina caussa che plai ni interessescha el, sa fixar in termin cun Paul Nay per prender envesta dalla caussa leu en sia nova localitad. Il niev liug a Trun duei esser aviarts ton per clients che drovan plaz ni che vulan bardigliar/rumiar il dacasa, sco era per clients che apprezieschan ina decoraziun interna sin fundament da vegl e modern. Ina da sias specialitads ei da cumbinar vegl cun modern ed aschia dar a caussas veglias ina nova muntada. Ord vegl far niev. Cun sia midada da domicil vegnan era las purschidas pli grondas. Sper sias caussas veglias promova Nay era objects dad art modern che van bein a prau cun antiquitads. Igl ei quei per exempel sculpturas da Fis Guldimann, cazzolas ord misels ni maletgs dall’artista Heidi Jerger.

Ina presentaziun da sias ovras ha liug naven dils 4 entochen ils 18 d’uost en siu atelier. Dapli informaziuns sur dallas purschidas anfleis vus sin la nova pagina d’internet www.artantic.ch.

Dei in’egliada, ei vala la peina. Sin bien seveser a Trun.