Nova zavrada da plastic

Dad Augustin Beeli / ANR

Rimnar plastic ei in trend general. «En tiaras jastras maldrovan ins nossa buna voluntad e nies quitau pigl ambient», ei la conclusiun che Conrad Lutz trai dall’unda actuala en Svizra. Il logisticher da Plaun Grond renda attent alla qualitad dil plastic rimnau. Igl ei daventau in sport da zavrar cartun, alumini, pupi, pet, veider e bia auter. Conrad Lutz, il menader dil stabiliment per l’economisaziun dil rumien a Plaun Grond, relativescha quella occupaziun. Pertgei plastic ei buca plastic, ei detti sorts ch’ins stoppi differenziar. «Nus selecziunein mo butteglias da material sintetic e cartuns da bubrondas», explichescha il logisticher da rumians. Pil consument eis ei plastic e tetrapac, pil logisticher rauba da qualitad. Lutz vul contonscher che la populaziun enconuscha la differenza denter plastic e material sintetic. «Cun nies sac special rimnein nus effectivamein mo quei ch’ins sa puspei luar e prender ella circulaziun», declara el.

pagina 3