In sonda esa festa a Strada

Da Flurin Andry / ANR

Per la tschinchavla jada as chattan in sonda a Strada chapellas chi sunan musica populara. Insembel cun Nina Grass e Luis Cagienard sunarà il musicist da Basilea Urs Mangold cumposiziuns da Rudolf Fliri barmör. Davo registrà plüssas plattas vaiva la Chapella Engiadina cun Mengia e Rudolf Fliri-Erni barmör, Jachen Erni e Bruno Kirchen registrà lur prüm disc cumpact «Viva il Grischun». «A quel battaisem pro no a Strada in garascha e sülla plazza davant vaivan tut part d’instà 2011 var 200 persunas», as regorda Ursina Fliri chi güda ad organisar ingon il tschinchavel inscunter, «tanter tuots d’eiran eir musicants da chapellas engiadinaisas chi han sunà per festagiar il disc.» Quai ha plaschü als preschaints uschè bain chi’d es nada, sco ch’ella disch, «l’idea dad organisar ün oter on ün inscunter plü grond ed invidar a Strada a chapellas e fuormaziuns da musica populara dal Grischun e forsa eir d’utrò.»

Il prüm on amo our i’l liber

Il prüm da quists inscunters suot l’insaina da la musica populara ha gnü lö da l’on 2013. «Quel vaina fat our i’l liber, sülla plazza davo la chà da scoula», manzuna Fliri, «no vain però constatà chi va meglder a sunar dadaint, perquai han gnü lö ils prossems inscunters in sala polivalenta.» Il seguond inscunter es stat ün special: Da l’on 2014 es quel stat suot l’insaina dal 40avel giubileum da la Chapella Engiadina, cumbinà cul battaisem dal disc «Rebomb da l’En». Quel on vaiva sunà la Chapella Engiadina in trais generaziuns: Jachen Erni, Bruno Kirchen e Mengia e Rudolf Fliri-Erni, insembel cun lur trais figlias Maria Pardeller, Uorschlina Beer e Sara Fliri Etter e cun lur abiadis Moreno Pardeller, Fiona Beer, Niculin e Claudio Etter.

Cun fuormaziuns da tuot la Svizra

Id han sunà, e per part eir chantà quel on a Strada, ultra da la Chapella Engiadina, il Quartet da brass Zernez, il Ländlertrio Oswald Schaub, la Kapelle GrauBÜNDIG, la Hüsmüsig Wallis (Eggerberg), la Familienkapelle Butzerin, la Kapelle Viamala, il Coro masdà Valsot, la Chapella Jünaiver, la Chapella Tasna, il Trio Duranand, la Chapella Val Mora e la Chapella Valsot. «I füss meis giavüsch da cuntinuar a far da quists inscunters, fin chi dvainta üna tradiziun«, vaiva dit Rudolf Fliri quella jada a l’anr. Plü bod organisaiva’l i’l Hotel Waldhaus a Vulpera da quists inscunters, «cur cha l’hotel es ars giò es quai i però a perder.» Seis giavüsch s’ha accumpli: Eir i’ls ons 2015 e 2016 s’han chattadas a Strada chapellas da musica populara da tuot la Svizra. In schner 2017 es Rudolf Fliri mort. Perquai nun haja dat quel on e neir dal 2018 ingün inscunter.

«In algordanza a Rudolf»

«Ingon vaina pensà chi’s pudess laschar renascher, eir in algordanza a Rudolf, la tradiziun dals inscunters da musica populara a Strada», ha cuntinuà Ursina Fliri. Insembel cun Cagienard ha ella organisà ingon il tschinchavel inscunter. Da las set a las ot la saira dà la fuormaziun Blazenka ün concert. «Els sunan aint la festa», declera ella. Da quista fuormaziun fan part, sco ch’Ursina Fliri declera, «üna dunzaina dad Engiadinaisas ed Engiadinais da Schlarigna fin Sent chi sunan musica i’l stil Egerländer». Da la partida sun in sonda saira eir las chapellas Tamangur, Val Mora, Tasna, Alp Laret, Jünaiver, la Chapella Erni e natüralmaing eir la Chapella Engiadina. «Dal Baselbiet sarà preschaint Urs Mangold chi suna insembel cun Nina Grass e Luis Cagienard da la Chapella Jünaiver cumposiziuns da Rudolf Fliri.» Per l’ustaria pissera la società Giuventüna Strada-Martina: «Els drivan la chadafö fingià a las ses la saira, uschè chi exista eir la pussibiltà da tschanar in sala polivalenta.»

Il tschinchavel inscunter da musica populara a Strada in chasa da scoula es in sonda, ils 17 avuost a las 18.00. Il prüm concert dà a las 19.00 la fuormaziun Blazenka.