Verda – Grünbünden

Dad Anita Mazzetta

La partida Verda stat per ina moda da viver ed in’economia consequentamain ecologica. Ils Verds s’engaschan però er per solidaritad, egualitad ed ina societad averta. La strategia per las sfidas dal futur è clera: Nus duvrain in’economia circulara, energias regenerablas ed il power da dunnas. Nus duvrain soluziuns verdas – ussa! Las sfidas actualas èn grondas e cumplexas. La crisa dal clima e las resursas che van a digren pericliteschan fauna e flora e cun quai nossa basa d’existenza. Igl è cler: nus na pudain betg pli cuntinuar sin noss planet sco fin ussa, sfarlattar resursas e stgaudar il clima. Nus duvrain ina protecziun da l’ambient consequenta ed ina midada da nossa moda da viver. Mo uschia èn las enormas sfidas dal futur da superar. La partida verda dal Grischun stat per ina politica cun ina mira a lunga vista e per tut en tut.

In’agricultura ed in’alimentaziun biologica, stagiunala e regiunala

Prest in terz dal CO2 vegn chaschunà da noss’alimentaziun. In’agricultura biologica ed in consum conscient cun products da stagiun regiunals èn perquai centrals. L’agricultura biologica, adattada al lieu e circulara na dovra nagins ladims minerals e pesticids sintetics e n’er betg imports da pavel. Er foodwaste, victualias che van a finir el rument, strapa-tschan las resursas naturalas. I dovra mesiras sin tut la chadaina da producziun e furniziun. Er emballadis exagerats ston vegnir reducids. La politica agrara sto promover in’agricultura cumpatibla cun l’ambient. Il Grischun cun 60 per-tschient bains purils bio è in model per l’entira Svizra.

Diriger il traffic ed in implant solar 
sin mintga tetg

Il traffic chaschuna la gronda part dal CO2 en Svizra. Il parlament a Berna ha fin oz però refusà d’introducir ina taxa sin benzin. Er la finamira da l’iniziativa da las Alps, da spustar il transit da camiuns sin las rodaglias, n’è fin oz betg ademplida. Il traffic betg motorisà è da promover pli consequentamain cun vias da velo attractivas per il traffic pendular e cun ina purschida gratuita dal traffic public regiunal. Fin oz na sto il traffic aviatic betg pajar taxas sin cherosin – quai sto sa midar.

Anc adina vegn la gronda part dals bajetgs stgaudads cun ieli u gas. La sanaziun dals bajetgs vegls na vegn betg giu dal flatg. Qua dovri directivas da la Confederaziun e sustegns attractivs. Da promover èn er soluziuns energeticas intelligentas che collian e furneschan entirs areals e quartiers. Energias localas sco energia solara, geotermia, chalur ed aua persa pon uschia vegnir utilisadas optimalmain per stgaudar sco er per rinfrestgar. Cun novas investiziuns en stgaudaments d’ieli ed en raits da gas èsi da far fin. I dat avunda alternativas. E sin min-tga tetg tutga da princip in implant solar.

Per solidaritad, egualitad 
ed ina societad averta

Ina societad solidarica sa basa sin giustia sociala e la participaziun da tuts. En la politica ed economia dovri ina participaziun paritetica da dunnas ed umens. Nus refusain tutta discriminaziun ed ans engaschain per rinforzar nossa democrazia.

www.verda-gr.ch