In tec febra e tuts ein puspei giuvens e leghers

DA SUSI ROTHMUND / ANR

Las attractivas e simpaticas cantauturas Francine Jordi, Diana e Christina Maria Sieber han incantau il publicum a Sedrun aschi bein sco ils rassigs musicists e cantauturs dallas gruppas Zipfelbuben e Jung Fidelen ni il solist Vincent Gross. Rodund 530 persunas ein stadas la sonda al festival «febra da schlaghers» organisaus dall’Uniun events Tgina dil Rein. Silvio Schmid presidiescha l’Uniun events Tgina dil Rein ed ei el comite d’organisaziun dalla febra da schlaghers 2019. Suenter ina sera musicala gartegiada e sala pleina ha el declarau: «Miu facit ei fetg positivs. Igl ei surprendent cons hosps ch’ein vegni, ils artists eran cuntents e l’atmosfera fetg familiara e buna.» Da tuttas varts ha Schmid udiu resuns positivs e quei po legrar dublamein ils organisaturs che speran uss aunc cun in quen equilibrau. Sch’il quen va si san ei plaunet gia entscheiver a planisar la secund’ediziun dalla febra da schlaghers che duei haver liug ils 5 da settember 2020.

Far il pass 
suenter la comba

Ch’ils fans da schlaghers e musica populara anflan tuttavia la via tochen a Sedrun ei semussau gia il 2016 e 2017 cu ils dis da schlaghers han giu liug en tenda a Dieni. Quels eran denton aunc vegni organisai d’autras persunas e malgrad ch’ei era vegniu discurriu da success havevan ei schau anavos cefras cotschnas. Tenor Schmid dat ei aunc oz crediturs ch’han buca survegniu tut ils daners ch’ei han dabien. Perquei numna el cun in surrir sia finamira la pli gronda: «Jeu hai sperau da saver ir suenter il festival tras il vitg senza stuer temer da survegnir giu pil tgau.» Sco el ha tradiu ier ei quei gartegiau. Per evitar tals «fiascos» finanzials sco dils dis da schlaghers han ils novs organisaturs sapientivamein organisau in festival empau pli pign, mudest e surveseivel che quels dils onns avon. Ina strategia che para d’haver purtau success. Era sch’il quen final ei aunc buca fatgs ei Schmid optimistics ed ha astgau prender encunter massa resuns positivs da hosps ed era dils artists ch’han schau plascher oreifer l’atmosfera. Gia duront lur producziuns han ils artists communicau a moda simpatica cul publicum ed han era bandunau la tribuna per cantar vinavon ellas retschas dil publicum. Era suenter han differents dad els priu peda da dar autograms, schar fotografar cun fans, dar ina paterlada ni semplamein guder l’atmosfera ella sala polivalenta. Sco Schmid ha tradiu ei Diana ina dallas artistas ch’ha aunc dabien daners dils dis da schlaghers a Dieni, tuttina hagi ella dau ina schanza a Sedrun e danovamein seschau engaschar. Igl ei vegniu fatg il pass suenter la comba quella ga e quei han hosps ed interprets schau plascher, schau infectar dalla febra e tuts eran puspei «giuvens e leghers».

Propi buca sexi

Cun «propi buca sexi» ein tuttavia buc ils hosps ni interprets dil festival manegiai. Biaras dunnas eran numnadamein sevestgidas cun dirndls ed eran propi sexi – schibein sco ils umens cun caultschas da curom. Il dentertetel fa allusiun a tut in auter fatg – numnadamein alla declaraziun d’amur per romontsch. Duront sia producziun ha Francine Jordi cantau l’emprema strofa da «Buna notg – dorma bein» – ina canzun romontscha ch’ei cantavien pli baul en famiglia. Bia dapli romontsch sa Jordi denton buc e perquei ha ella vuliu saver dil publicum co ins declari per romontsch «ich liebe dich». Gia in’ura pli tard haveva ella emblidau ch’ins ditgi «jeu carezel tei». Riend ha ella manegiau: «Quei tuna fetg cumplicau e propi buca romantic ni sexi. Quei savess era muntar – sai jeu haver in toc paun.» Silla damonda tgei ch’ils Romontschs savessien far per mantener lur lungatg ha ella rispundiu che quei seigi empau sco cul tudestg da Berna che mondi era pli e pli fetg a piarder. «Mintgin sto entscheiver tier sesez, surprender responsabladad, discuorer, duvrar e dar vinavon il lungatg.» Pils organisaturs dil festival febra da schlaghers ha Jordi anflau grond laud. Ei seigi vegniu preparau ed organisau cun bia cor e pissiun. Jordi ei gia stada il 2016 a Sedrun e cumparegliond ha ella schau plascher oreifer il festival empau pli pign: «L’atmosfera ei stada grondiusa, jeu sundel sesentida bein e tuornel bugen.»